लोणी काळभोर, ता. ३० : श्री स्वामी विवेकानंद शिक्षण संस्थेच्या माजी सचिवा स्व. प्रा. सौ. शुभांगीताई गावडे यांच्या जयंतीनिमित्त लोणी काळभोर (ता. हवेली) येथील पृथ्वीराज कपूर मेमोरियल हायस्कूलमध्ये गुरुवारी (ता. ३०) वृक्षारोपण, आरोग्य संवर्धन आणि विद्यार्थ्यांना शैक्षणिक साहित्य वाटपासह विविध सामाजिक उपक्रमांचे आयोजन करण्यात आले. पर्यावरण संरक्षण, आरोग्य जागृती आणि सामाजिक बांधिलकीचा संदेश देणाऱ्या या उपक्रमाला विद्यार्थ्यांचा उत्स्फूर्त प्रतिसाद लाभला.
या कार्यक्रमाची सुरुवात स्व. शुभांगी गावडे यांच्या प्रतिमेचे पूजन करून करण्यात आली. यावेळी त्यांच्या शिक्षण, समाजसेवा आणि संस्थेच्या उभारणीत दिलेल्या उल्लेखनीय योगदानाचा गौरवपूर्ण शब्दांत आढावा घेण्यात आला. या कार्यक्रमास साधना सहकारी बँकेच्या अध्यक्षा वंदनाताई राजकुमार काळभोर, शासकीय आरोग्य अधिकारी मनोज थावरे, श्री स्वामी विवेकानंद शिक्षण संस्थेचे सहसचिव (प्रशासन) तथा विद्यालयाचे प्राचार्य सीताराम गवळी, उपमुख्याध्यापक विलास शिंदे आणि वृक्षमित्र अमित जगताप यांची प्रमुख उपस्थिती होती.
या कार्यक्रमात विद्यालय परिसरात वृक्षारोपण करून पर्यावरण संवर्धनाचा संदेश देण्यात आला. तसेच विद्यार्थ्यांसाठी ‘आरोग्य संवर्धन ही काळाची गरज’ या विषयावर मार्गदर्शन करण्यात आले. आरोग्यदायी जीवनशैली, स्वच्छता आणि पर्यावरणाचे महत्त्व याविषयी विद्यार्थ्यांना मार्गदर्शन करण्यात आले. वृक्षमित्र अमित जगताप यांनी वृक्षलागवडीचे महत्त्व पटवून देत प्रत्येक विद्यार्थ्याने किमान एक झाड लावून त्याचे संगोपन करण्याचे आवाहन केले. त्यांनी गरजू विद्यार्थ्यांना शैक्षणिक साहित्याचे वाटप करून सामाजिक बांधिलकी जपली. तर वंदनाताई काळभोर यांनीही विद्यार्थ्यांना वह्यांचे वाटप करून त्यांच्या शिक्षणाला प्रोत्साहन दिले.
दरम्यान, पर्यावरण संरक्षण, आरोग्य जागृती आणि समाजसेवेचा संदेश देणारा हा उपक्रम विद्यार्थ्यांसाठी प्रेरणादायी ठरला. मान्यवर, शिक्षक, शिक्षकेतर कर्मचारी आणि विद्यार्थ्यांच्या उत्स्फूर्त सहभागामुळे कार्यक्रम उत्साहात पार पडला. कार्यक्रमाचे सूत्रसंचालन ज्येष्ठ शिक्षिका कल्पना बोरकर यांनी केले.चितारे, अमोल नलगे, नारायण वाळके, राम जाधव, मच्छिंद्र निचीत यांनी सहभाग घेत ही उल्लेखनीय कामगिरी बजावली आहे.
