मुंबई : मुंबईतील राजभवन परिसरातून धक्कादायक घटना समोर आली आहे. राज्यपालांच्या सुरक्षेसाठी तैनात असलेल्या एका जवानाने स्वतःवर गोळी झाडून आपले आयुष्य संपवले. या दुर्दैवी घटनेमुळे संपूर्ण परिसरात तीव्र खळबळ उडाली आहे.
मिळालेल्या माहितीनुसार, आत्महत्या केलेल्या या जवानाचे नाव कौस्तुभ सांगळे असे होते. ते मूळचे नाशिकचे रहिवासी होते आणि कोल्हापूर येथील राज्य राखीव पोलीस दलाच्या (SRPF) ग्रुप १६ च्या तुकडीमध्ये पोलीस अंमलदार म्हणून कार्यरत होते. सध्या त्यांची ड्युटी मुंबईतील मलबार हिल येथील राजभवनात लावण्यात आली होती.
सोमवारी नेहमीप्रमाणे कौस्तुभ राजभवन परिसरातील ‘लोक भवन’ येथे आपल्या कर्तव्यावर हजर झाले होते. मात्र, ड्युटीवर असतानाच त्यांनी अचानक त्यांच्याकडील शासकीय सर्व्हिस रायफलमधून स्वतःवर गोळी झाडली. गोळीबाराचा प्रचंड आवाज ऐकून तिथे उपस्थित असलेल्या इतर कर्मचाऱ्यांमध्ये गोंधळ उडाला. या घटनेत गंभीर जखमी झालेल्या कौस्तुभ यांचा अतिरक्तस्रावामुळे घटनास्थळीच मृत्यू झाला.
या घटनेची माहिती मिळताच मलबार हिल पोलिसांनी तात्काळ घटनास्थळी धाव घेतली. पोलिसांनी कौस्तुभ यांचा मृतदेह ताब्यात घेऊन तो शवविच्छेदनासाठी जे. जे. रुग्णालयात पाठवला आहे. प्राथमिक तपासानुसार, कौटुंबिक वादातून किंवा मानसिक तणावातून त्यांनी हे टोकाचे पाऊल उचलले असावे, असा अंदाज पोलिसांनी व्यक्त केला आहे.
पोलिसांना घटनास्थळावरून कोणतीही सुसाईड नोट मिळालेली नाही. त्यामुळे त्यांच्या या आत्महत्येचे नेमके आणि अचूक कारण अजूनही अस्पष्ट आहे. या गंभीर प्रकरणाचा पुढील सखोल तपास मुंबई पोलिसांकडून केला जात आहे. जवानाच्या अशा अचानक जाण्याने त्यांच्या कुटुंबियांवर दुःखाचा डोंगर कोसळला आहे.
