पुणे: पुण्यातील कात्रज परिसरात एका कौटुंबिक वादातून अत्यंत संतापजनक प्रकार घडल्याचे समोर आले आहे. आपल्या मुलींमधील किरकोळ वाद मिटवण्याचा प्रयत्न करणाऱ्या पत्नीला पतीने जबर मारहाण केली. या घटनेत पत्नीचे नाकाचे हाड फॅक्चर झाले असून, मोबाईल देखील फोडण्यात आला आहे. या प्रकरणी भारती विद्यापीठ पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, ३७ वर्षीय विवेक गणपत निकम असे आरोपी पतीचे नाव असून, तो कात्रज परिसरात आपल्या कुटुंबासह राहतो. ४ जुलै रोजी रात्री ११:३० च्या सुमारास ही घटना घडली. तक्रारदार ३३ वर्षीय गौरी निकम यांच्या दोन मुलींमध्ये काही क्षुल्लक कारणावरून वाद सुरू होता. रात्रीची वेळ असल्याने मुलींनी शांत राहावे आणि वाद मिटावा, या उद्देशाने गौरी त्यांना समजावण्याचा प्रयत्न करत होत्या. मात्र, याच वेळी तिथे उपस्थित असलेल्या विवेक निकमचा पारा चढला.
पतीने विनाकारण रागाच्या भरात गौरी यांना अत्यंत घाणेरड्या भाषेत शिवीगाळ करण्यास सुरुवात केली. एवढ्यावरच न थांबता, त्याने गौरी यांना लाथाबुक्क्यांनी बेदम मारहाण केली. ही मारहाण इतकी भीषण होती की, त्यात गौरी यांच्या नाकाचे हाड फॅक्चर झाले आहे.
पत्नी गौरी निकम यांनी दिलेल्या तक्रारीवरून भारती विद्यापीठ पोलिसांनी विवेक निकम याच्या विरोधात गुन्हा दाखल केला असून, पोलीस या प्रकरणाचा अधिक तपास करत आहेत.
