पुणे : महाराष्ट्र शासनाचे ‘आपले सरकार’ हे महत्त्वाचे पोर्टल आणि इतर काही ऑनलाइन शासकीय सेवा आज (16 ऑक्टोबर) सायंकाळी 4 वाजल्यापासून ते 21 ऑक्टोबरपर्यंत तात्पुरत्या स्वरूपात बंद राहणार आहेत. या सेवांच्या सॉफ्टवेअरचे व्हर्जन 1 वरून नवीन ‘व्हर्जन 2.0’ मध्ये अद्ययावतीकरण (अपडेशन) करण्याचे काम केले जात आहे. त्यामुळे या पाच दिवसांच्या काळात नागरिकांना काही काळासाठी ऑनलाईन प्रमाणपत्रांचे व इतर कामांचे अर्ज करण्यासाठी थांबावे लागणार आहे.
या तांत्रिक अपडेशनमागचा मुख्य उद्देश शासकीय सेवा अधिक वेगवान, पारदर्शक आणि सुलभ करणे हा आहे. प्रणाली अद्ययावत झाल्यानंतर नागरिकांना येणाऱ्या तांत्रिक अडचणी दूर होतील आणि ऑनलाइन कामांचा अनुभव सुधारण्यास मदत होईल, असे प्रशासनाकडून स्पष्ट करण्यात आले आहे. दरम्यान, या नियोजित कालावधीत कोणतीही सेवा मिळणार नसल्याने नागरिकांनी याची नोंद घ्यावी आणि त्यानुसार आपली महत्त्वाची शासकीय कामे पुढे आखावीत, असे आवाहन प्रशासनाने केले आहे.
दरम्यान, नुकत्याच पार पडलेल्या उच्चाधिकार समितीच्या बैठकीत राज्याचे मुख्यमंत्री देवेंद्र फडणवीस यांनी डिजिटल सेवांच्या वितरणावर विशेष भर दिला आहे. केवळ तांत्रिक कामे पूर्ण करणे म्हणजे डिजिटल प्लॅटफॉर्मचे यश नसून, नागरिकांना ती वापरताना किती सोयीचे ठरते, हे खऱ्या अर्थाने महत्त्वाचे असल्याचे त्यांनी सांगितले. अर्ज प्रक्रिया सुलभ असावी आणि नागरिकांना वेळेत सेवा मिळावी, यावर सर्व संबंधित विभागांनी लक्ष केंद्रित करावे, असे निर्देशही त्यांनी दिले आहेत.
प्रशासकीय कामांना गती देण्यासाठी विविध विभागांचे बाह्य पोर्टल्स आगामी 30 नोव्हेंबरपर्यंत ‘आपले सरकार’ आणि ‘मैत्री’ या मुख्य प्लॅटफॉर्मशी जोडण्याचे उद्दिष्ट ठेवण्यात आले आहे. तसेच, सेवांचा विकास, एकात्मीकरण, अधिकाऱ्यांचे प्रशिक्षण आणि नागरिकांमध्ये जनजागृती करण्याचे काम आगामी 15 डिसेंबरपर्यंत पूर्ण करण्याचे स्पष्ट निर्देश देण्यात आले आहेत.
