गोवा : गोव्यात फिरण्यासाठी आणि नोकरीसाठी गेलेल्या पुण्यातील 26 वर्षीय तरुणाचा दुर्दैवी मृत्यू झाला. राय-शिवोली परिसरातील भाड्याच्या खोलीत ही घटना घडली. रोहित जळगावकर असे मृत तरुणाचे नाव आहे. तो हैदराबादमधील आपल्या मैत्रिणीसोबत तेथे राहत होता. दोघेही घरून काम करत होते.
मिळालेल्या माहितीनुसार, शुक्रवारी सकाळी दोघांमध्ये किरकोळ कारणावरून वाद झाला. सुरुवातीला हा प्रकार थट्टा-मस्करीत सुरू होता. मात्र, काही वेळाने रोहित नाराज झाला. त्यानंतर तो स्वयंपाकघरात गेला. तेथून त्याने भाजी कापण्याचा चाकू आणला.
रोहितने मैत्रिणीसमोर चाकू घेत स्वतःला इजा करण्याची धमकी दिल्याचे सांगितले जात आहे. मात्र, त्याचे बोलणे मैत्रिणीने गंभीरपणे घेतले नाही. काही क्षणांतच त्याने स्वतःच्या पोटावर चाकूने वार केला आणि तो जमिनीवर कोसळला.
घटनेनंतर खोलीत एकच गोंधळ उडाला. गंभीर जखमी झालेल्या रोहितला तातडीने उपचारासाठी शिवोली प्राथमिक आरोग्य केंद्रात नेण्यात आले. मात्र, डॉक्टरांनी तपासल्यानंतर त्याला मृत घोषित केले.
घटना घडली त्यावेळी रोहितची मैत्रीण लॅपटॉपवर काम करत होती, अशी प्राथमिक माहिती आहे. या घटनेनंतर पोलिसांनी त्याच्या मैत्रिणीला ताब्यात घेतले असून तिची चौकशी सुरू केली आहे. पोलिसांनी सध्या या प्रकरणात अनैसर्गिक मृत्यूची नोंद केली आहे. घटनेमागील नेमके कारण काय होते, याचा तपास सुरू आहे.
