पंजाब: मनोरंजन क्षेत्रातून एक धक्कादायक बातमी समोर आली आहे. प्रसिद्ध पंजाबी गायक बलजीत सिंह हे त्यांच्या राहत्या घरी मृतावस्थेत आढळून आले. ते 35 वर्षांचे होते. गेल्या 4 ते 5 दिवसांपासून त्यांच्याशी कोणाचाही संपर्क होत नव्हता. अखेर घरातून दुर्गंधी येऊ लागल्यानंतर शेजाऱ्यांना संशय आला आणि त्यांनी पोलिसांना माहिती दिली.
ही घटना 3 सप्टेंबर रोजी सकाळी उघडकीस आली. पोलिसांनी घरात प्रवेश केल्यानंतर बलजीत सिंह यांचा मृतदेह पलंगावर आढळला. मृतदेह सडला होता. त्यामुळे त्यांचा मृत्यू काही दिवसांपूर्वीच झाला असावा, असा प्राथमिक अंदाज व्यक्त करण्यात आला.
मिळालेल्या माहितीनुसार, गायकाचा मृतदेह पलंगाला टेकलेल्या अवस्थेत होता, तर त्याचे हात वरच्या बाजूला असल्याचे दिसून आले. या परिस्थितीमुळे सुरुवातीला पोलिसांना घटनेबाबत संशय निर्माण झाला आणि त्यांनी त्या दिशेनेही तपास सुरू केला.
मात्र, घरातील काही खोल्यांमध्ये रक्ताचे डाग आढळल्याने पोलिसांचा संशय वाढला. सुरुवातीला या घटनेमागे घातपाताची शक्यता आहे का, याचा तपास करण्यात आला. त्यासाठी फॉरेन्सिक टीम, श्वानपथक आणि CIA पथक घटनास्थळी दाखल झाले. पोलिसांनी घराची तपासणी करून विविध पुरावे गोळा केले.
बलजीत यांच्या मृत्यूपूर्वी त्यांच्या घरी कोण आले होते, तसेच ते मागील काही दिवसांत कोणाच्या संपर्कात होते, याची माहिती मिळवण्यासाठी पोलिसांनी परिसरातील CCTV फुटेज तपासण्यास सुरुवात केली आहे. कुटुंबीय आणि नातेवाईकांकडूनही माहिती घेतली जात आहे.
दरम्यान, शवविच्छेदन अहवालातून त्यांच्या मृत्यूचे कारण स्पष्ट झाले. पोलिसांच्या माहितीनुसार, बलजीत सिंह यांचा मृत्यू हृदयविकाराच्या झटक्याने झाल्याचे पोस्टमार्टममध्ये समोर आले आहे. त्यामुळे हत्या किंवा घातपाताच्या शक्यतेबाबतचा सुरुवातीचा संशय काहीसा कमी झाला आहे. मात्र, घरात आढळलेल्या रक्ताच्या डागांसह इतर बाबींची चौकशी अद्याप सुरू आहे.
बलजीत सिंह सुधर येथील धालीवाल परिसरात एकटे राहत होते. त्यांच्या मृतदेहावर सिव्हिल हॉस्पिटलमध्ये शवविच्छेदन करण्यात आले. त्यानंतर मृतदेह कुटुंबीयांच्या ताब्यात देण्यात आला.
मीडिया रिपोर्टनुसार, अलीकडच्या काळात ते व्यसनाच्या आहारी गेल्याची चर्चा होती. त्यांच्या काही गाण्यांवर गँगस्टर संस्कृतीचे उदात्तीकरण केल्याचे आरोपही झाले होते. मात्र, या बाबींचा त्यांच्या मृत्यूशी थेट संबंध असल्याचे अद्याप स्पष्ट झालेले नाही.
