लोणी काळभोर, ता. 21: रस्त्यावर पडलेल्या (Loni Kalbhor News) मद्यपीला उचलुन बाजुला करत असताना झालेल्या वादातून दोघांना शिवीगाळ करून बेल्ट व लाथाबुक्क्यांनी बेदम मारहाण केल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील पठारेवस्ती परिसरात मंगळवारी (ता.18) रात्री साडेअकरा वाजण्याच्या सुमारास घडली आहे. लोणी काळभोर पोलीस ठाण्यात तिघांच्या विरोधात गुन्हा दाखल करण्यात आला आहे.
गौरव यशवंत रोकडे, दत्तात्रय राजेंद्र धायगुडे व नितीन नायकवडे (तिथेही रा. पठारेवस्ती, कदमवाकवस्ती ता. हवेली जि. पुणे) अशी गुन्हा दाखल करण्यात आलेल्यांची नावे आहेत. आदित्य धर्मपाल कांबळे (वय-21, अंबाबाई मंदिराच्या पाठिमागे, कदमवाकवस्ती, ता. हवेली जि.पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी आदित्य कांबळे हे त्यांचा मित्र सुशांत दगडे याला घरी सोडविण्यासाठी चालले होते. रस्त्याने जात असताना वाटेत यशवंत रोकडे हे मद्यधुंद अवस्थेत रस्त्यावरच पडलेले होते. कांबळे व सुशांत दगडे हे त्यांना उचलुन बाजुला करण्याकरीता गेले. तेव्हा यशवंत रोकडे यांनी शिवीगाळ केली. फिर्यादी कांबळे व दगडे यांनी सांगितले की, शिवीगाळ करू नका. आम्ही तुम्हाला मदत करत आहे. तरीही रोकडे शिवीगाळ करत होते.
तेवढ्यात यशवंत रोकडे यांचा मुलगा गौरव रोकडे व त्याचा मित्र दत्तात्रय धायगुडे व नितीन नायकवडे हे तेथे आले. आणि गौरव म्हणाला की, वडिलांना एकटे बघून मारहाण करता काय? असे म्हणून तिघांनी मिळून शिवीगाळ करून कांबळे व दगडे यांना लाथाबुक्क्यांनी मारहाण केली. त्यावेळी कांबळे व दगडे यांनी आम्ही तुमच्या वडिलांना मदत करत असल्याचे सांगितले. परंतु, दत्तात्रय धायगुडे यांचे काहीही न ऐकता कंबरेच्या पट्ट्याने कांबळे यांना मारहाण केली.
दरम्यान, हे भांडण सुरु असताना, फिर्यादी आदित्य कांबळे यांचा मित्र सुशांत हा भांडणे सोडविण्यासाठी मध्यस्थी करू लागला तेव्हा दत्तात्रय धायगुडे म्हणाले की, तू येथून जरी सुटला तरी मी तुला जीवे मारून टाकीन व तुझ्या घरच्यांना देखील मारून टाकीन? अशी धमकी झाली आहे. या मारहाणीत फिर्यादी आदित्य कांबळे हे जखमी झाले असून त्यांच्या डोक्याला , पोटाला व पायावर मारहाण करण्यात आली आहे.
याप्रकरणी कांबळे यांनी लोणी काळभोर पोलीस ठाण्यात फिर्याद दिली आहे. त्यानुसार तिघांच्या विरोधात भारतीय न्याय संहिता कलम 118(1), 115(2), 352,351, (2) (3), 3 (5) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार विजय जाधव करत आहेत.
