पुणे: राज्यातील महिलांसाठी महत्त्वाच्या असलेल्या ‘मुख्यमंत्री माझी लाडकी बहीण’ योजनेबाबत (Ladaki Bahin Yojana Update) सरकारने दिलासादायक (Ladaki Bahin Yojana e-KYC) निर्णय घेतला आहे. महिला व बालविकास मंत्री अदिती तटकरे यांनी (Aditi Tatkare) या योजनेच्या ई-केवायसी दुरुस्तीची अंतिम मुदत आता 30 एप्रिलपर्यंत वाढवण्यात आल्याची माहिती दिली आहे. (Latest Marathi News)
यापूर्वी ई-केवायसी पूर्ण करण्याची मुदत 31 मार्चपर्यंत होती. मात्र अनेक महिलांचे केवायसी अपूर्ण राहिल्याचे लक्षात आल्यानंतर सरकारने ही मुदत एक महिना वाढवण्याचा निर्णय घेतला. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या सूचनेनुसार ही मुदतवाढ देण्यात आल्याचे तटकरे यांनी स्पष्ट केले.
‘मुख्यमंत्री माझी लाडकी बहीण’ योजना जुलै 2024 पासून सुरू करण्यात आली असून, पात्र महिलांना दरमहा 1500 रुपये आर्थिक मदत दिली जाते. मात्र या लाभासाठी ई-केवायसी प्रक्रिया पूर्ण करणे अनिवार्य आहे. अनेक लाभार्थी तांत्रिक अडचणी किंवा कागदपत्रांच्या अपूर्णतेमुळे ही प्रक्रिया वेळेत पूर्ण करू शकले नव्हते.
या पार्श्वभूमीवर सरकारने “शेवटची संधी” म्हणून मुदतवाढ दिली आहे. त्यामुळे ज्यांचे ई-केवायसी प्रलंबित आहे, त्यांनी 30 एप्रिलपूर्वी प्रक्रिया पूर्ण करणे अत्यावश्यक आहे. अन्यथा योजनेचा लाभ बंद होण्याची शक्यता आहे.
हा निर्णय विशेषतः ग्रामीण आणि डिजिटल सुविधांपासून दूर असलेल्या महिलांसाठी महत्त्वाचा ठरणार आहे. आता उर्वरित लाभार्थींनी ही संधी गमावू नये, असे आवाहन सरकारकडून करण्यात आले आहे.
