पुणे: पुणे जिल्ह्यातील चाकण परिसरातील दावडमळा येथे माणुसकीला (Pune Shocking News) काळिमा फासणारी एक अत्यंत धक्कादायक घटना समोर आली आहे. एका १५ वर्षीय अल्पवयीन (Pune Crime) मुलीवर तिच्या जन्मदात्या वडिलांनीच बलात्कार केल्याचा संतापजनक प्रकार उघडकीस आला आहे. या घटनेमुळे संपूर्ण परिसरात खळबळ उडाली असून स्थानिक नागरिकांकडून तीव्र संताप व्यक्त केला जात आहे. (Latest Marathi News)
मिळालेल्या माहितीनुसार, पीडित मुलगी घरात एकटी असल्याचे पाहून आरोपी वडिलाची नियत फिरली. त्याने मुलीला जीवे मारण्याची भीती घालून आणि धमकावून तिच्यावर जबरदस्तीने अत्याचार केला. रक्ताच्या नात्याला कलंक लावणाऱ्या या घटनेमुळे पीडित मुलगी प्रचंड हादरली होती, मात्र तिने अत्यंत धैर्याने या परिस्थितीचा सामना केला. तिने स्वतः पोलीस स्टेशन गाठून आपल्यावर झालेल्या अन्यायाची सविस्तर माहिती दिली.
पंधरा वर्षांच्या या मुलीची आपबिती ऐकून पोलीस अधिकारीही अवाक झाले. मुलीने दिलेल्या तक्रारीची गांभीर्याने दखल घेत चाकण उत्तर पोलिसांनी तात्काळ तपासाची चक्रे फिरवली आणि नराधम बापाला बेड्या ठोकल्या. या प्रकरणात पीडित मुलीने दाखवलेले धाडस कौतुकास्पद मानले जात आहे, कारण सहसा अशा कौटुंबिक प्रकरणांत भीतीपोटी गुन्हे दडपले जातात.
सध्या पोलिसांनी आरोपीविरुद्ध बालकांविरुद्ध लैंगिक अत्याचार प्रतिबंधक कायदा म्हणजेच पोक्सो (POCSO) अंतर्गत गुन्हा दाखल केला आहे. यासोबतच भारतीय न्याय संहितेतील संबंधित कलमेही लावण्यात आली आहेत. पोलिसांनी पीडित मुलीची वैद्यकीय तपासणी केली असून तिचा जबाब नोंदवून घेतला आहे.
या घटनेनंतर चाकण परिसरात सुरक्षेचा प्रश्न पुन्हा एकदा ऐरणीवर आला आहे. सामाजिक संघटना आणि स्थानिक रहिवाशांनी या घटनेचा निषेध करत आरोपीला कठोरात कठोर शिक्षा व्हावी, अशी मागणी केली आहे. नराधम बापाने केलेल्या या कृत्यामुळे समाजात संतापाची लाट असून, पोलीस प्रशासन या प्रकरणाचा अधिक तपास करत आहे. भविष्यात अशा घटना रोखण्यासाठी आणि अल्पवयीन मुलींना सुरक्षित वातावरण देण्यासाठी प्रशासनाने कडक पावले उचलणे गरजेचे असल्याचे मत नागरिकांनी व्यक्त केले आहे.
