Nagpur Funeral Accident: नागपूर शहरातून एक धक्कादायक घटना समोर येत आहे. एका अंत्यसंस्कारांच्या वेळी चितेजवळ अचानक भडका लागल्यामुळे एका व्यक्तीचा मृत्यू झाला तर आणखी चार जण गंभीर जखमी झाले आहेत. ही घटना नागपूरच्या वाठोडा परिसरात घडली. या घटनेची पोलिसांनी नोंद घेतली असून पुढील तपास सुरु केला आहे.
समोर आलेल्या माहितीनुसार, वाठोडा परिसरातील गोपालकृष्ण लॉनच्या मागे स्थायी असलेल्या सुशीलबाई हरिभाऊ मुंघाटे(वय 83) यांचे निधन झाले होते. गुरुवारी सकाळी वाठोडा दहनघाटात त्यांच्या पार्थिवाचे अंत्यसंस्कार सुरू होते. कुटुंबीयांसह नातेवाईक अंतिम यात्रेत सहभागी झाले.
अंतिम विधी सुरू असताना विनोद पुंडलिकराव मुंघाटे (वय 64, रा. कर्वेनगर, वर्धा रोड) हे चितेजवळ उभे होते. याच वेळी, चितेने अचानक पेट घेतला. या प्रचंड आगीत विनोद गंभीररित्या भाजले गेले. तसेच त्यांच्या बाजूला उभे असलेले आणखी चार जण आगीच्या भडक्यामुळे गंभीर जखमी झाले. या घटनेमुळे दहनघाटात गोंधळ उडाला. जखमींना तात्काळ रुग्णालयात दाखल करण्यात आले. रुग्णालयात उपचार सुरु होण्याआधीच विनोद यांचा मृत्यू झाला.
उपस्थितांनी दिलेल्या माहितीत कोणीतरी चितेवर पेट्रोल टाकला त्यामुळे आगीने भडका घेतला. पोलिसांना या प्रकरणी माहिती देण्यात आली असून पुढील तपास सुरु करण्यात आला आहे. डिझेल कोणी आणि का ओतले याचा शोध घेतला जात आहे.
हेही वाचा- मोमोजचा व्यवसाय उभा केला, फ्लॅट घेतला… अन् घरातील कर्त्या साहिलचा ताम्हिणी घाटात दुर्दैवी अंत
