लोणी काळभोर, ता. 29: पुणे सोलापूर लोहमार्गावर (Loni Kalbhor News) रेल्वेच्या अपघातात एका अनोळखी इसमाचा मृत्यू झाल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील माळी मळा परिसरात असलेल्या शेल पेट्रोल पंपांच्या रेल्वे लाईनवर घडली असून बुधवारी (ता.29) सकाळी साडे अकरा वाजण्याच्या सुमारास उघडकीस आली आहे. या अनोळखी इसमाची ओळख पटविण्याचे लोणी काळभोर पोलिसांसमोर आव्हान उभे राहिले आहे.
मिळालेल्या माहितीनुसार, रेल्वे कर्मचारी रुळाची देखबाल व दुरुस्ती करीत असताना, त्यांना एका अनोळखी इसमाचा मृतदेह रेल्वे लाईनच्या जवळ आढळून आला. या घटनेची माहिती रेल्वे कर्मचाऱ्यांनी तत्काळ लोहमार्ग व लोणी काळभोर पोलिसांना दिली. या घटनेची माहिती मिळताच, लोणी काळभोर पोलीस ठाण्याचे पोलीस हवालदार विजय जाधव, केतन धेंडे, राणी खामकर व बीट मार्शल वैभव खोत व रेल्वेचे पोलीस हवालदार शेख मन्सूर अब्दुल करीम हे तातडीने घटनास्थळी दाखल झाले.
दरम्यान, पोलिसांनी तत्काळ महाराजा रुग्णवाहिकेला बोलावले. पोलिसांनी मृतदेह ताब्यात घेऊन शवविच्छेदन करण्यासाठी रुग्णवाहिकेतून पुण्याला पाठविला आहे. शवविच्छेदनाचा अहवाल आल्यानंतर मृत्यूचे खरे कारण पुढे येईल. परंतु, हा इसम परप्रांतीय असून रेल्वेतून पडून मृत्यू झाल्याचा प्राथमिक अंदाज पोलिसांनी वर्तविला आहे. पुढील तपास लोणी काळभोर पोलीस करीत आहेत.
नागरिकांनी पोलिसांशी संपर्क साधावा: राजेंद्र पन्हाळे
अपघातात मृत्यू झालेल्या अनोळखी इसमाचे अंदाजे वय – 35 ते 40, उंची 165 से.मी. चेहरा गोल, रंग- काळा सावळा, केस- काळे वाढलेले, शरीर बांधा मजबुत, अंगात पांढरा, काळा आणि लाल रंगाचा चेक्स शर्ट व हिरव्या रंगाची लुंगी नेसलेली आहे. त्याच्याजवळ रेडमी कंपनीचा डीसप्ले गेलेला मोबाईल सापडलेला आहे. अशा अनोळखी इसमाची ओळख पटविण्याचे काम लोणी काळभोर पोलिस करीत आहेत. या अनोळखी इसामाबाबत जर कोणाला काही माहिती मिळाल्यास त्यांनी लोणी काळभोर पोलीस ठाण्याच्या 020-29995260 या क्रमांकावर संपर्क साधावा, असे आवाहन लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी केले आहे.
