लोणी काळभोर, ता. 13 : पैशांच्या वादातून तरुणावर (Loni Kalbhor Crime) लाथाबुक्क्यांनी मारहाण करत दगडाने डोक्यावर प्रहार केल्याची धक्कादायक घटना घडली आहे. ही घटना कुंजीरवाडी (ता. हवेली) ग्रामपंचायत हद्दीतील मगरवस्ती परिसरात शुक्रवारी (ता.10) सायंकाळी साडेपाच वाजण्याच्या सुमारास घडली आहे. या घटनेमुळे परिसरात खळबळ उडाली असून लोणी काळभोर पोलिस ठाण्यात चौघांविरोधात गुन्हा दाखल करण्यात आला आहे.
सुरज गोपीनाथ घोळवे (वय 30), गोपीनाथ अजिनाथ घोळवे (वय 50), राजू बिटटू घोळवे (वय-35) व जनाबाई गोपीनाथ घोळवे (वय 46, सर्व रा. कुंजीरवाडी, ता. हवेली) अशी गुन्हा दाखल करण्यात आलेल्यांची नावे आहेत. याप्रकरणी आदेश अंकुश सोनवणे (वय 19, रा. शेवाळवाडी फाटा, मांजरी बुद्रुक) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी आदेश सोनवणे यांच्या वडिलांकडे ट्रक ड्रायव्हर म्हणून काम करणाऱ्या सुरज घोळवे याने काही महिन्यांपूर्वीचे कामाचे पैसे मागण्यासाठी फोन करून शिवीगाळ केली होती. याबाबत जाब विचारण्यासाठी आदेश सोनवणे हा सुरजच्या घरी गेले होते. तेथे सुरजला पैसे मागण्याबाबत विचारणा करताच वाद वाढला. त्याचवेळी राजू बिटटू घोळवे याने मागून पकडले, तर सुरजने शिवीगाळ करत पैशांची मागणी केली. आदेश यांनी पैसे देण्यास नकार दिल्यानंतर सुरज व त्याचे नातेवाईक आक्रमक झाले.
दरम्यान, सुरजची आई जनाबाई घोळवे तसेच गोपीनाथ घोळवे व इतरही तेथे जमा झाले. सर्वांनी मिळून आदेश यांना शिवीगाळ करत लाथाबुक्क्यांनी बेदम मारहाण केली. यावेळी सुरज घोळवे याने हातातील दगड उचलून आदेश यांच्या डोक्यावर प्रहार केला, ज्यामुळे त्यांच्या डोक्याला गंभीर दुखापत झाली. हल्ल्यानंतर आरोपींनी “पुन्हा आमच्या नादी लागलास तर जिवंत सोडणार नाही,” अशी धमकी दिली .
जखमी अवस्थेत आदेश यांनी लोणी काळभोर पोलीस ठाणे गाठले, आणि आरोपींच्या विरोधात तक्रार दिली. त्यानुसार सुरज घोळवे, गोपीनाथ घोळवे, राजू घोळवे व जनाबाई घोळवे यांच्याविरोधात भारतीय न्याय संहिता (BNS) 2023 च्या कलम 115(1), 118(1), 3(5), 351(2), 351(3), 352 अन्वये गुन्हा दाखल करण्यात आला आहे.
