पुणे: सिंहगडाच्या पश्चिमेकडील घेरा सिंहगड गावाजवळ बिबट्याच्या हालचालींमुळे नागरिकांमध्ये भीतीचे वातावरण निर्माण झाले आहे. खानापूर-रांजणे-पाबे मार्गावरील बापूजी बुवा मंदिर परिसरात मंगळवारी (13 ऑक्टोबर) संध्याकाळी बिबट्याने तीन दुचाकीस्वारांवर हल्ले केल्याच्या घटना समोर आल्या. यातील एका युवतीला बिबट्याचा पंजा लागल्याने ती जखमी झाली असून, तिच्यावर पुण्यातील ससून रुग्णालयात उपचार सुरू आहेत.
स्थानिकांनी दिलेल्या माहितीनुसार, जंगलातून जाणाऱ्या आणि डोंगराचा उतार असलेल्या या रस्त्यावर सुमारे एका तासात तीन घटना घडल्या. त्यामुळे या मार्गावरून प्रवास करणाऱ्या नागरिकांनी सतर्क राहण्याची गरज निर्माण झाली आहे.
पहिली घटना सायंकाळी साडेसहाच्या सुमारास घडली. आंबेगाव बुद्रुक येथे राहणारे ओम शिंदे आणि तुषार कांबळे हे खामगावहून खानापूरच्या दिशेने दुचाकीवरून जात होते. त्यावेळी बिबट्याने त्यांच्या दुचाकीवर झडप घातली. बिबट्या दुचाकीच्या चाकाला धडकल्याने वाहनाचा तोल गेला; मात्र दुचाकी पडली नाही. त्यानंतर बिबट्या आवाज करत डोंगराच्या खालच्या बाजूला निघून गेला.
दुसऱ्या घटनेत थोपटेवाडी येथील धोंडीबा थोपटे हे मुलगी सोनाली आणि तिच्या मैत्रिणीसोबत खानापूरहून घरी परतत होते. यावेळी बिबट्याने त्यांच्या दुचाकीवर हल्ला केला. यात सोनालीला बिबट्याचा पंजा लागून ती जखमी झाली. तिला प्रथम खानापूर येथील प्राथमिक आरोग्य केंद्रात नेण्यात आले. त्यानंतर पुढील उपचारांसाठी ससून रुग्णालयात दाखल करण्यात आले.
तिसऱ्या घटनेत कोंडगाव येथील एका तरुणाच्या दुचाकीचा बिबट्याने पाठलाग केला. बिबट्या सुमारे 15 ते 20 फूट अंतरापर्यंत त्याच्या मागे धावत असल्याचे सांगण्यात आले. घटनांची माहिती मिळताच भांबुर्डा वनविभागाचे अधिकारी घटनास्थळी रवाना झाले. दरम्यान, बिबट्याचा शोध सुरु आहे.
