पुणे : लाचखोरीच्या एका मोठ्या प्रकरणात केंद्रीय अन्वेषण विभागाने मोठी कारवाई केली आहे. पुण्यात म्युनिशन्स इंडिया लिमिटेडचे कार्यकारी संचालक अनिल कुमार यांच्या घरी टाकण्यात आलेल्या छाप्यात तब्बल 1 कोटी 73 लाख रुपयांची रोकड जप्त करण्यात आली आहे. या प्रकरणात अनिल कुमार यांच्यासह आणखी दोन जणांना अटक करण्यात आली असून, या कारवाईमुळे संरक्षण क्षेत्रातील कंत्राटांमधील भ्रष्टाचाराचे मोठे जाळे उघडकीस आले आहे.
म्युनिशन्स इंडिया लिमिटेड ही कंपनी भारतीय लष्कर, नौदल, हवाई दल आणि निमलष्करी दलांसाठी दारूगोळा व स्फोटके तयार करण्याचे महत्त्वाचे काम करते. 12 ऑक्टोबर रोजी सीबीआयने अनिल कुमार यांच्याविरोधात भ्रष्टाचाराचा गुन्हा नोंदवला होता. सरकारी कामांमध्ये काही खासगी कंत्राटदारांना बेकायदेशीर फायदा मिळवून देण्यासाठी त्यांनी लाच मागितल्याचा संशय आहे.
या प्रकरणात एसएमपीपी लिमिटेड या ड्रोन तंत्रज्ञान आणि दारूगोळा निर्मिती क्षेत्रात काम करणाऱ्या कंपनीचे मुख्य कार्यकारी अधिकारी तथा संचालक आशीष कंसल यांच्यावरही संशय व्यक्त केला जात आहे. एसएमपीपी लिमिटेडला एका वर्षात सुमारे 500 कोटी रुपयांचे दारूगोळा पुरवठा करण्याचे कंत्राट मिळाले होते. हे कंत्राट मिळवून देण्यासाठी आणि कंत्राटदारांना मदत करण्यासाठी हा सर्व गैरव्यवहार झाल्याचा सीबीआयचा आरोप आहे.
सध्या या प्रकरणाचा अधिक तपास सुरू असून, या रॅकेटमध्ये आणखी कोणाचे सहभाग आहेत हे शोधण्याचे काम सुरू आहे
