पुणे : उद्योगपती मुकेश अंबानी यांच्या ‘अँटिलिया’ घराबाहेर स्फोटकांनी भरलेली गाडी ठेवल्याप्रकरणी आणि उद्योगपती मनसुख हिरेन हत्या प्रकरणात माजी पोलीस अधिकारी सचिन वाझे मुख्य आरोपी आहे. सुमारे साडेपाच वर्षे तुरुंगात राहिल्यामुळे विशेष एनआयए न्यायालयाने त्याला जामीन मंजूर केला होता. मात्र, राष्ट्रीय तपास यंत्रणेने या जामिनाविरोधात मुंबई उच्च न्यायालयात दाद मागितल्याने वाझेचा तुरुंगातून बाहेर येण्याचा मार्ग पुन्हा कठीण झाला आहे.
उच्च न्यायालयात झालेल्या सुनावणीदरम्यान एनआयएने अत्यंत महत्त्वाचा आणि धक्कादायक युक्तिवाद केला. एनआयएच्या मते, सचिन वाझे याने केलेले कृत्य हे केवळ साधी धमकी नसून थेट ‘दहशतवादी कृत्य’ होते. वाझेने जिलेटिनच्या कांड्या गाडीत ठेवून केलेल्या या कृत्यामुळे देशाच्या आर्थिक सुरक्षेला मोठा धोका निर्माण झाला असता. दहशतवादी कृत्य ठरवताना केवळ आरोपीच्या वक्तव्यावर न राहता, त्याने केलेल्या प्रत्यक्ष कृतीवर भर दिला पाहिजे, असा दावा तपास यंत्रणेने केला.
तसेच, एखादी घटना घडल्यानंतर किंवा प्रत्यक्ष स्फोट झाल्यानंतरच त्याला दहशतवादी कृत्य म्हणावे, ही भूमिका चुकीची आहे, असा युक्तिवाद एनआयएने केला. सामान्य माणूस गाडीत काय आहे हे तपासायला जाणार नाही, त्यामुळे आरोपीचा मूळ हेतू त्याच्या कृतीवरूनच स्पष्ट होतो. या प्रकरणात टेलिग्रामवर देण्यात आलेल्या धमकीच्या पत्रात राजकीय पक्ष, दहशतवादी संघटना आणि सामाजिक-सांप्रदायिक संदर्भ समाविष्ट होते. त्यामुळे हे केवळ घाबरवण्यासाठी लिहिलेले पत्र नसून त्यामागे मोठा कट होता, असे एनआयएने स्पष्ट केले.
दुसऱ्या बाजूला, सचिन वाझेच्या वकिलांनी या प्रकरणात कोणताही दहशतवादी हेतू नसल्याचा दावा केला आहे. या प्रकरणात एनआयए न्यायालयाने सचिन वाझेसह 10 आरोपींविरोधात आरोप निश्चित केले होते, ज्यानंतर त्याला जामीन मिळाला होता. परंतु एनआयएच्या आक्रमक युक्तिवादामुळे आता वाझेच्या अडचणीत मोठी वाढ झाली आहे.
