मुंबई : विरार पश्चिमेकडील अर्नाळा सागरी पोलीस ठाण्याच्या हद्दीतून धक्कादायक बातमी समोर आली आहे. एका 32 वर्षीय ज्युनिअर आर्टिस्ट आणि सहाय्यक अभिनेत्रीने विष प्राशन करून आपले जीवन संपवले आहे.नलिनी नामजोशी असे या मृत महिलेचे नाव असून, ती विरारच्या जेपी नगर भागात आई आणि भावासोबत राहत होती. या दुर्दैवी घटनेमुळे संपूर्ण परिसरात खळबळ उडाली आहे.
गुरुवारी सकाळी नलिनी नेहमीप्रमाणे फिरण्यासाठी घराबाहेर पडली होती. मात्र, बऱ्याच वेळापर्यंत ती घरी न परतल्यामुळे तिच्या कुटुंबियांमध्ये चिंता पसरली. त्यांनी तिचा शोध सुरू केला. शोधाशोध सुरू असतानाच, विरारच्या ओलांडा नाका परिसराजवळ तिचा मृतदेह आढळून आला. या घटनेमुळे तिच्या कुटुंबावर दुःखाचा डोंगर कोसळला आहे.
या प्रकरणात तिच्या कुटुंबियांनी एका म्युझिक डायरेक्टरवर गंभीर आरोप केले आहेत. मृत महिलेच्या भावाने दिलेल्या फिर्यादीनुसार, सौरभ पत्की नावाच्या म्युझिक डायरेक्टरने तिला फिल्म इंडस्ट्री आणि वेब सीरिजमध्ये काम मिळवून देण्याचे खोटे आमिष दाखवले होते. जानेवारी 2026 पासून त्याने तिच्याशी जवळीक वाढवली आणि त्यानंतर तिचे अश्लील फोटो व व्हिडिओ काढून तिला ब्लॅकमेल करण्यास सुरुवात केली. तसेच तिच्याकडून तब्बल 1 कोटी रुपये उकळल्याचा गंभीर आरोपही करण्यात आला आहे. नलिनीने मृत्यूपूर्वी लिहिलेल्या चिठ्ठीमध्येही या गोष्टीचा उल्लेख असल्याचे समजते.
पोलीस सूत्रांनी दिलेल्या माहितीनुसार, गुरुवारी सकाळी साडेसहाच्या सुमारास अर्नाळ्याकडे जाणाऱ्या रस्त्यावरील एका बाकड्यावर बसून तिने विषारी औषध सेवन केले होते. या प्रकरणाची माहिती मिळताच अर्नाळा सागरी पोलीस ठाण्याचे वरिष्ठ पोलीस निरीक्षक सतीश निकम आणि त्यांच्या टीमने तातडीने घटनास्थळी धाव घेतली. त्यांनी महिलेला तातडीने उपचारासाठी रुग्णालयात दाखल केले, परंतु उपचारादरम्यान तिचा मृत्यू झाला.
सध्या याप्रकरणी पोलिसांनी गुन्हा दाखल केला असून आरोपी सौरभ पत्की हा फरार झाला आहे. पोलीस त्याचा कसून शोध घेत असून या प्रकरणाचा सखोल तपास सुरू आहे.
