पुणे: सावित्रीबाई फुले पुणे विद्यापीठातील मुलींच्या वसतिगृहात परवानगीशिवाय प्रवेश केल्याच्या प्रकरणी 2 विद्यार्थ्यांविरोधात चतुःशृंगी पोलीस ठाण्यात गुन्हा दाखल करण्यात आला आहे. रविवारी (11 ऑक्टोबर) घडलेल्या या प्रकारानंतर विद्यार्थिनींनी वसतिगृहाच्या परिसरात आंदोलन करत सुरक्षेच्या व्यवस्थेबाबत प्रशासनाला जाब विचारला.
विद्यापीठातील सुरक्षा अधिकारी संपत पांडुरंग पाटील यांनी यासंदर्भात पोलिसांकडे तक्रार नोंदवली. त्यानुसार मुलांच्या वसतिगृहात राहणारे प्रमोद राठोड आणि ओंकार गोरे यांच्याविरोधात भारतीय न्याय संहितेच्या कलम 329(1) अंतर्गत गुन्हा दाखल करण्यात आला आहे. या प्रकरणाचा पुढील तपास पोलीस करत आहेत.
मिळालेल्या माहितीनुसार, विद्यापीठाच्या मुलींच्या वसतिगृहात पुरुषांना प्रवेश करण्यास मनाई आहे. असे असतानाही दोघांनी रविवारी वसतिगृहाच्या परिसरात अनधिकृतपणे प्रवेश केल्याचा आरोप आहे. त्यानंतर एका विद्यार्थिनीशी संबंधित गैरप्रकाराची माहिती समोर आल्याने वसतिगृहातील विद्यार्थिनींमध्ये नाराजी पसरली. त्यांनी रविवारी रात्री एकत्र येत आंदोलन केले आणि सुरक्षेच्या प्रश्नावर प्रशासनाचे लक्ष वेधले.
या घटनेनंतर विद्यार्थिनींच्या शिष्टमंडळाने सोमवारी कुलगुरू डॉ. सुरेश गोसावी यांची भेट घेतली. वसतिगृहात बाहेरील व्यक्ती किंवा अनधिकृत प्रवेश करणाऱ्यांना रोखण्यासाठी असलेल्या व्यवस्थेतील त्रुटी दूर करण्याची मागणी त्यांनी केली. विद्यार्थिनींच्या सुरक्षेचा मुद्दा ऐरणीवर आल्यानंतर विद्यापीठ प्रशासनाने या प्रकरणाची दखल घेत पोलिसांकडे तक्रार दिली.
