पुणे: पुणे जिल्ह्यातील जुन्नर शहरात (Junnar News) महाविद्यालयीन विद्यार्थिनीवर झालेल्या हल्ल्याच्या घटनेमुळे परिसरात मोठी खळबळ उडाली आहे. आदिवासी (Pune Crime) मुलींच्या शासकीय वस्तीगृहासमोर दिवसाढवळ्या एका तरुणाने धारदार शस्त्राने विद्यार्थिनीवर हल्ला केल्याची धक्कादायक घटना घडली. (Latest Marathi News)
मिळालेल्या प्राथमिक माहितीनुसार, गौरी संजय सावळे (वय 20) ही महाविद्यालयीन विद्यार्थिनी सकाळी सुमारे 10 वाजण्याच्या सुमारास नेहमीप्रमाणे वस्तीगृह परिसरात होती. त्याच वेळी महेश मुरलीधर डामसे या तरुणाने अचानक तिच्यावर धारदार हत्याराने हल्ला केला. आरोपीने विद्यार्थिनीच्या चेहऱ्यावर आणि मानेवर अनेक वार केल्याची माहिती समोर आली आहे.
दिवसाढवळ्या घडलेल्या या घटनेमुळे परिसरात एकच खळबळ उडाली. हल्ला केल्यानंतर आरोपी महेश डामसे घटनास्थळावरून तात्काळ फरार झाला. घटनास्थळी उपस्थित असलेल्या स्थानिक नागरिकांनी आणि विद्यार्थ्यांनी जखमी अवस्थेतील गौरी सावळे हिला तातडीने रुग्णालयात दाखल केले. तिच्यावर उपचार सुरू असल्याची माहिती मिळत आहे.
प्राथमिक तपासात आरोपी आणि जखमी विद्यार्थिनी हे दोघेही एकाच गावातील रहिवासी असल्याचे समोर आले आहे. आरोपी महेश डामसे हा काही दिवसांपासून विद्यार्थिनीला त्रास देत असल्याची माहितीही मिळत असून या पार्श्वभूमीवरच हा हल्ला झाला असावा असा संशय व्यक्त केला जात आहे.
घटनेची माहिती मिळताच जुन्नर पोलीस ठाण्याचे अधिकारी आणि कर्मचारी तातडीने घटनास्थळी दाखल झाले. पोलिसांनी परिसराची पाहणी करून पंचनामा सुरू केला असून फरार आरोपीचा शोध घेण्यासाठी विशेष पथक तयार करण्यात आले आहे.
या धक्कादायक घटनेमुळे जुन्नर शहरात भीती आणि संतापाचे वातावरण निर्माण झाले आहे. दिवसाढवळ्या विद्यार्थिनीवर हल्ला झाल्याने नागरिकांनी आरोपीला तातडीने अटक करण्याची मागणी केली आहे. या प्रकरणाचा पुढील तपास जुन्नर पोलीस करत असून तपासानंतर अधिक माहिती समोर येण्याची शक्यता आहे.
