न्हावरे(ता.शिरूर,जि.पुणे): शिरूर तालुक्याच्या पूर्व भागातील न्हावरे येथे एमडी ड्रग्सच्या विरोधात स्थानिक गुन्हे शाखा (एलसीबी) आणि शिरूर पोलिसांनी संयुक्त कारवाई केल्याची माहिती पोलीस सूत्रांकडून मिळाली आहे. या कारवाईत काही तरुणांना अटक करण्यात आल्याची माहिती समोर आली असून, या घटनेने न्हावरेसह शिरूरच्या पूर्व भागात मोठी खळबळ उडाली आहे.
न्हावरे परिसरात एमडी ड्रग्ससारख्या अंमली पदार्थांची विक्री अथवा त्याचा पुरवठा होत असल्याच्या संशयाच्या पार्श्वभूमीवर पोलिसांनी ही कारवाई केल्याचे समजते. पोलिसांच्या या कारवाईमुळे अंमली पदार्थांचे जाळे केवळ शहरापुरते मर्यादित न राहता गाव तसेच वाडी-वस्त्यांपर्यंत पोहोचल्याची गंभीर बाब पुढे आली आहे.
दरम्यान, अंमली पदार्थांच्या वाढत्या वापरामुळे तरुण पिढीच्या भवितव्याचा प्रश्न ऐरणीवर आला आहे. त्यामुळे अशा पदार्थांची विक्री, साठवणूक व वितरण करणाऱ्यांविरोधात कठोर कारवाई करण्याची मागणी नागरिकांकडून होत आहे.
या कारवाईत नेमका किती मुद्देमाल जप्त करण्यात आला, अटक करण्यात आलेल्या व्यक्तींची संख्या किती आहे तसेच एमडी ड्रग्सचा पुरवठा कुठून होत होता, याबाबत पोलिसांकडून अधिकृत माहिती जाहीर होणे अपेक्षित आहे. पोलिसांच्या तपासातून या प्रकरणामागील संपूर्ण साखळी उघड होण्याची शक्यता आहे.
न्हावरे परिसरात झालेल्या या कारवाईमुळे अंमली पदार्थांच्या वाढत्या विळख्याबाबत पुन्हा एकदा गंभीर प्रश्न निर्माण झाला असून, पोलिसांकडून पुढील तपासाला वेग देण्यात आला आहे.
सविस्तर बातमी थोड्या वेळात…..
