पुणे : पुणे शहरातील गुन्हेगारीबाबत पोलिसांच्या आकडेवारीतून महत्त्वाची माहिती समोर आली आहे. यंदाच्या वर्षात ऑगस्ट 2026 पर्यंत शहरात जीवे मारण्याच्या 61 घटना नोंदवण्यात आल्या आहेत. मागील वर्षी याच कालावधीत हा आकडा 57 होता. त्यामुळे यंदा अशा घटनांमध्ये वाढ झाल्याचे दिसून येत आहे.
पुणे शहरातील 44 पोलिस ठाण्यांच्या हद्दीतील गुन्ह्यांचा आढावा घेतल्यास 2024 मध्ये वर्षभरात जीवे मारण्याच्या 94 घटना घडल्या होत्या. 2025 मध्ये ही संख्या कमी होऊन 84 वर आली. मात्र, 2026 मध्ये वर्षातील आठ महिने पूर्ण होण्यापूर्वीच 61 घटना घडल्याने पोलिसांसमोर चिंतेचा विषय निर्माण झाला आहे.
पोलिस ठाण्यांच्या आकडेवारीनुसार, भारती विद्यापीठ परिसरात सर्वाधिक 5 घटना नोंदल्या आहेत. त्यानंतर वाघोलीमध्ये 4, तर खडक, पर्वती, वारजे माळवाडी, नांदेड सिटी, येवलेवाडी आणि चंदननगर परिसरात प्रत्येकी 3 घटना झाल्या आहेत. काही भागांत मागील वर्षाच्या तुलनेत गुन्ह्यांची संख्या वाढली असली, तरी काही पोलिस ठाण्यांच्या हद्दीत एकही अशी घटना नोंदलेली नाही.दुसरीकडे, जीवे मारण्याच्या प्रयत्नांच्या गुन्ह्यांमध्ये यंदा मोठी घट दिसून आली आहे.
हाणामारीतून होणाऱ्या दुखापतीच्या घटनांमध्येही घट झाली आहे. 2025 मध्ये 7 ऑगस्टपर्यंत 923 गुन्हे दाखल झाले होते. यंदा याच कालावधीत 862 गुन्हे नोंदवले गेले. म्हणजेच अशा गुन्ह्यांमध्ये 61 ने घट झाली आहे. 2024 मध्ये याच कालावधीत 945 गुन्हे नोंदले गेले होते.
