Indapur Politics : इंदापूरमध्ये राजकारणाला अचानक वेग आला आहे. राष्ट्रवादी काँग्रेसचे पुणे जिल्हाध्यक्ष प्रदीप गारटकर यांनी जोरदार विरोध केला असतानाही अजित पवार गटाने नगराध्यक्ष पदाची उमेदवारी भरत शहा यांच्या नावावर निश्चित केली आहे. त्यामुळे इंदापूरातील राजकारण चांगलचं तापलं आहे. शनिवारी (१५ तारखेला) भरत शहा यांनी मोठ्या समर्थकांसह उमेदवारी अर्ज दाखल केला. पक्षाने आमचा आवाज ऐकला नाही तर आम्हीही पक्षाला सोडू, असा इशारा प्रदीप गारटकर यांनी आधीच दिला होता. तरीही पक्षाने त्यांचा प्रस्ताव नाकारत भरत शहा यांनाच उमेदवारी दिली. त्यामुळे आता गारटकर स्थानिक आघाडी करून निवडणूक लढवणार, हे जवळपास स्पष्ट झाले आहे. मात्र ते सोमवारी अधिकृत भूमिका जाहीर करणार आहेत. (Indapur Politics)
शहरात गेल्या काही दिवसांपासून कोणाला उमेदवारी मिळणार याकडे सगळ्यांचे लक्ष होते. अखेर अजित पवार गटाने भरत शहा यांच्या नावावर शिक्कामोर्तब केले आणि त्यामुळे जिल्हाध्यक्ष गारटकर यांना मोठा धक्का बसल्याचं बोललं जात आहे.
जिल्हाध्यक्ष गारटकर राजीनामा देतील का?
इंदापूर नगराध्यक्षपद सर्वसाधारण असून भरत शहा हे आधी शरद पवार गटात होते. त्यांना अजित पवार गटात घेऊन थेट नगराध्यक्ष पदाची उमेदवारी देण्याला गारटकर आणि त्यांच्या समर्थकांनी जोरदार विरोध केला होता.
या तिढ्यामुळे पुण्यात अजित पवार, दत्तात्रय भरणे आणि गारटकर यांची बैठकही झाली. पण गारटकर यांच्या मर्जीप्रमाणे निर्णय झाला नाही. त्यामुळे ते इंदापूरला परत येत कार्यकर्त्यांची बैठक घेतली. या बैठकीत पक्ष आमच्या विरोधात गेला तर आम्ही राजीनामा देऊ आणि स्थानिक आघाडी करून निवडणूक लढवू, असा निर्णय त्यांनी घेतला.
बैठकीत गारटकर म्हणाले होते, “पक्षाने आमचं ऐकलं नाही तर आम्हाला बाहेर पडायला हरकत नाही. जर पक्षाने आम्हाला कोललं, तर आम्हीही पक्षाला कोलल्याशिवाय राहणार नाही.” त्यामुळे आता ते नेमकी कोणती भूमिका घेणार—राजीनामा देणार की दुसरा पर्याय निवडणार—याकडे सगळ्यांचे लक्ष लागले आहे.
