पुणे : श्री क्षेत्र रांजणगाव गणपती देवस्थानच्या विश्वस्त मंडळात महागणपतीच्या चार बहिणींच्या गावांतील प्रतिनिधींचा समावेश करावा, अशी आग्रही मागणी ढोकसांगवी येथील शिवमल्हार विकास संस्थेचे माजी अध्यक्ष ॲड. बाबुराव पाचंगे यांनी केली आहे. यासंदर्भातील मागणीचे निवेदन त्यांनी नुकतेच देवस्थान ट्रस्टचे सचिव तुषार पाचुंदकर यांच्याकडे सोपवले.
रांजणगाव देवस्थानमध्ये सध्या जिल्हास्तरावर एका प्रतिनिधीची नियुक्ती केली जाते. याच धर्तीवर करडे, निमगाव म्हाळुंगी, गणेगाव खालसा आणि ढोकसांगवी या चार गावांतील प्रत्येकी एका नागरिकाला विश्वस्तपदी संधी मिळावी, असा प्रस्ताव या निवेदनात मांडण्यात आला आहे. या चारही गावांना महागणपतीच्या बहिणींची गावे म्हणून धार्मिक मान्यता व इतिहास आहे.
भाद्रपद गणेशोत्सवादरम्यान निघणाऱ्या महागणपतीच्या पारंपरिक पालखी द्वारयात्रेत या गावांना अत्यंत महत्त्वाचे स्थान आहे. या सोहळ्यात सहभागी होणाऱ्या हजारो भाविकांची आणि द्वारकरींची सेवा-सुश्रूषा स्थानिक ग्रामस्थ मोठ्या श्रद्धेने करतात. या गावांना विश्वस्त मंडळात स्थान मिळाल्यास पालखी सोहळ्यादरम्यान भक्तांसाठी अधिक चांगल्या सोयी-सुविधा उपलब्ध करून देणे शक्य होईल. तसेच या धार्मिक परंपरेचा आणि गावांच्या मानाचा सन्मान जपला जाईल, असा विश्वास ॲड. पाचंगे यांनी व्यक्त केला. यासाठी देवस्थानच्या घटनेत आवश्यक सुधारणा करण्याची विनंती त्यांनी केली आहे.
निवेदन देण्याच्या प्रसंगी श्रीगोंद्याचे माजी आमदार राहुल जगताप, देवस्थान ट्रस्टचे माजी अध्यक्ष प्रा. एकनाथ खेडकर, उद्योजक राहुल आढाव आणि नाना लांडे यांच्यासह इतर नागरिक उपस्थित होते.
