आदित्य बोराटे
इंदापुर: इंदापूर तालुक्यातील निमगाव केतकी येथील काही जिल्हा परिषद शिक्षकांनी “क्रिप्टोकरन्सी आणि शेअर मार्केटमध्ये गुंतवणूक केल्यास पैसे डबल करून देऊ” असे आमिष दाखवून गावातील अनेक नागरिकांची कोट्यवधी रुपयांची फसवणूक केल्याचा गंभीर आरोप समोर आला आहे. यामुळे गावात मोठी खळबळ उडाली आहे.
सूत्रांनी दिलेल्या माहितीनुसार, गेल्या काही महिन्यांपासून निमगाव केतकीतील काही शिक्षकांनी गावातील ओळखीचा आणि विश्वासाचा फायदा घेतला. “आम्ही शेअर मार्केट आणि क्रिप्टोमध्ये तज्ञ आहोत, तुमचे पैसे कमी वेळात डबल होतील” असे सांगून नागरिकांकडून मोठ्या प्रमाणात रोख रक्कम गोळा केली.
सुरुवातीला काहींना परतावा दिल्याने इतरांनीही विश्वास ठेवून पैसे दिले. मात्र आता पैसे परत मागितल्यावर संबंधित शिक्षक “बाजारात तोटा झाला आहे” असे सांगून टाळाटाळ करत आहेत.
आरोप आहे की यातील एका जिल्हा परिषद शिक्षकाने मोठी रक्कम गोळा केल्यानंतर तो अक्षरशः गाव सोडून गेला आहे. त्याचा सध्या कुठेही पत्ता लागत नसल्याचे स्थानिक सांगतात.
या फसवणुकीला बळी पडलेल्या नागरिकांनी आता एकत्र येऊन इंदापूर पोलिस ठाण्यात संबंधित शिक्षकांविरुद्ध फसवणुकीचा गुन्हा दाखल करण्याचा निर्णय घेतला असल्याची माहिती आहे. नागरिकांकडून पुरावे आणि व्यवहारांच्या नोंदी गोळा करण्याचे काम सुरू आहे.
पैशाच्या नुकसानीमुळे काही कुटुंबे मोठ्या आर्थिक आणि मानसिक तणावातून जात आहेत. “शेअर मार्केटमध्ये पैसे डबल होतील” या हवेमुळे गुंतवणूक केलेल्या काहींना आता कर्जाचा डोंगर झाला आहे. यामुळे गावात “पुढील काळात कोणी टोकाचे पाऊल उचलतील का?” अशी भीतीही व्यक्त होत आहे.
या प्रकरणामुळे शिक्षकांच्या प्रतिमेवर परिणाम झाला आहे. शिक्षण विभाग आणि पोलिसांनी या प्रकरणाची गंभीर दखल घेऊन चौकशी करावी, अशी मागणी गावकऱ्यांकडून होत आहे.
1. कोणत्याही “पैसे डबल” करून देणाऱ्या स्कीममध्ये गुंतवणूक करू नका.
2. क्रिप्टो/शेअरमध्ये गुंतवणूक फक्त SEBI नोंदणीकृत ब्रोकरमार्फतच करा.
3. रोखीत व्यवहार न करता बँक ट्रान्सफरचाच पुरावा ठेवा.
