अक्षय टेमगिरे
पुणे : पुणे-अहिल्यानगर महामार्गावर प्रवाशांना चाकूचा धाक दाखवून लुटणाऱ्या एका रिक्षाचालकाला आणि त्याच्या साथीदाराला शिक्रापूर पोलिसांनी जेरबंद केले आहे. पोलिसांनी आरोपींकडून चोरीचा मोबाईल आणि गुन्ह्यात वापरलेली रिक्षा असा एकूण १ लाख ४० हजार रुपयांचा ऐवज हस्तगत केला आहे.
नेमकी घटना काय?
सणसवाडी परिसरात ८ ऑगस्टच्या सायंकाळी ही घटना घडली. अंतर्यामी सुरेंदर दास कुमार (वय २२, रा. शिक्रापूर) हे रिक्षातून प्रवास करत होते. प्रवासादरम्यान अचानक रिक्षाचालक आणि त्याच्या साथीदाराने त्यांच्यावर धारदार चाकूने हल्ला केला. लुटारूंनी त्यांच्या गळ्यावर आणि हातावर वार करून सोन्याचे लॉकेट हिसकावण्याचा प्रयत्न केला. मात्र, अंतर्यामी यांनी धैर्याने प्रतिकार केल्याने आरोपींनी त्यांचा ओपो कंपनीचा मोबाईल जबरदस्तीने हिसकावून घेतला. स्वतःचा जीव वाचवण्यासाठी पीडिताने चालू रिक्षेतून खाली उडी मारली, तर आरोपी रिक्षेसह फरार झाले.
घटनेचे गांभीर्य लक्षात घेऊन शिक्रापूर पोलीस ठाण्याचे पोलीस निरीक्षक चंद्रशेखर यादव यांच्या मार्गदर्शनाखाली तपास सुरू झाला. पोलिसांनी परिसरातील सीसीटीव्ही फुटेजची सखोल तपासणी केली आणि बातमीदारांकडून गोपनीय माहिती मिळवली.
तपासाच्या आधारे पोलिसांनी कोरेगाव भीमा येथे सापळा रचून हर्षवर्धन उर्फ अजय अशोक फाजगे (वय २६) आणि राहुल दिलीप फाजगे (वय २०) यांना ताब्यात घेतले. चौकशीदरम्यान दोन्ही आरोपींनी गुन्ह्याची कबुली दिली. न्यायालयाने आरोपींना तीन दिवसांची पोलीस कोठडी सुनावली आहे.
ही धडक कारवाई पुणे ग्रामीणचे पोलीस अधीक्षक संदिपसिंह गिल्ल, अपर पोलीस अधीक्षक डॉ. शुभम कुमार, उपविभागीय अधिकारी रविंद्र भोसले आणि निरीक्षक चंद्रशेखर यादव यांच्या नेतृत्वाखाली करण्यात आली. यामध्ये उपनिरीक्षक उमाकांत कुंजीर, जितेंद्र पानसरे, हवालदार दामोदर होळकर, अमोल दांडगे, रोहीदास पारखे, नारायण वाळके आणि इतर सहकाऱ्यांचा समावेश होता.
रिक्षात बसवून निर्जन ठिकाणी लुटण्याच्या या घटनेमुळे प्रवाशांच्या सुरक्षेचा प्रश्न निर्माण झाला होता, मात्र शिक्रापूर पोलिसांनी अवघ्या काही दिवसांत आरोपींना जेरबंद करून कौतुकास्पद कामगिरी केली आहे.
