पुणे : पुण्यातील गणेशोत्सवात ध्वनिप्रदूषण रोखण्यासाठी आणि नागरिकांच्या आरोग्याच्या दृष्टीने एक महत्त्वाचा निर्णय घेण्यात येत आहे. यंदाच्या उत्सवात डीजे साऊंड सिस्टीममध्ये वापरल्या जाणाऱ्या ‘प्लाझ्मा’ आणि ‘प्रेशर मिड’ या उपकरणांवर पूर्णपणे बंदी घालण्याची जोरदार मागणी पुणे शहरातील प्रमुख गणेश मंडळांनी केली आहे. या संदर्भात पुणे पोलीस आयुक्तालयात विशेष बैठकीचे आयोजन करण्यात आले होते.
पोलीस आयुक्त अमितेश कुमार यांच्या अध्यक्षतेखाली ही महत्त्वपूर्ण बैठक पार पडली.मंडळांच्या या मागणीला सकारात्मक प्रतिसाद देत, पोलीस प्रशासनाने देखील या उपकरणांच्या वापरावर बंदी आणण्याचे संकेत दिले आहेत. प्लाझ्मा आणि प्रेशर मिडमुळे निर्माण होणाऱ्या तीव्र आवाजामुळे लहान मुले, वृद्ध आणि रुग्णांना प्रचंड त्रास सहन करावा लागतो. या निर्णयामुळे सर्वसामान्यांना मोठा दिलासा मिळण्याची शक्यता आहे.
गणेशोत्सवातील पारंपरिक वाद्यांचे महत्त्व टिकवून ठेवणे आणि आवाजाची मर्यादा पाळणे यावर बैठकीत भर देण्यात आला. पोलीस सूत्रांनी दिलेल्या माहितीनुसार, या बंदीबाबत लवकरच अधिकृत नियमावली जारी केली जाईल. नियमांचे उल्लंघन करणाऱ्या साऊंड सिस्टीम चालकांवर कडक कायदेशीर कारवाई करण्याचा इशाराही प्रशासनाने दिला आहे.
तसेच आगामी उत्सव शांततेत आणि शिस्तबद्ध वातावरणात पार पडावा, यासाठी पोलीस आणि गणेश मंडळे संयुक्तपणे काम करत आहेत.
