शिरूर, ता. ८ : पेट्रोलपंपाच्या गार्डनसाठी पाणीपुरवठा करणारा टँकर बंद केल्याच्या कारणावरून पेट्रोलपंप व्यवस्थापकाला जातीवाचक शिवीगाळ करत जीवे मारण्याची धमकी दिल्याचा धक्कादायक प्रकार शिरूर तालुक्यातील न्हावरे येथे उघडकीस आला आहे. या प्रकरणी शिरूर पोलिसांनी आरोपीविरुद्ध अनुसूचित जाती-जमाती (अत्याचार प्रतिबंधक) कायद्यासह भारतीय न्याय संहितेच्या विविध कलमांन्वये गुन्हा दाखल केला आहे.
याप्रकरणी संतोष सतीश चंदनशिवे (वय २६, रा. केडगाव, ता. दौंड) यांनी शिरूर पोलिस ठाण्यात फिर्याद दिली आहे. तर संतोष रामदास जाधव (रा. न्हावरे, ता. शिरूर) याच्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी संतोष चंदनशिवे हे गेल्या पाच वर्षांपासून न्हावरे येथील अमरदीप पेट्रोलियम (भारत पेट्रोलपंप) येथे व्यवस्थापक म्हणून कार्यरत आहेत. काही महिन्यांपूर्वी पेट्रोलपंपाच्या गार्डनसाठी लागणाऱ्या पाण्याचा टँकर आरोपी संतोष जाधव याच्याकडून घेतला जात होता. मात्र, नंतर दुसऱ्या टँकरची सेवा सुरू केल्याने आरोपीचा टँकर बंद करण्यात आला.
याच कारणाचा राग मनात धरून ५ जुलै रोजी सायंकाळी साडेचारच्या सुमारास आरोपी इनोव्हा कारमधून पेट्रोलपंपावर आला. त्याने फिर्यादीला, “तुला खूप माज आला आहे का? माझा टँकर का बंद केला? माझ्या पोटावर पाय दिलास,” असे म्हणत वाद घातला. त्यानंतर फिर्यादी अनुसूचित जातीतील असल्याचे माहीत असतानाही त्याला जातिवाचक अपशब्द वापरून अपमानित केले. तसेच, “पुन्हा पंपावर दिसलास तर जिथे दिसशील तिथे गाडीखाली चिरडून टाकीन,” अशी धमकी देऊन आरोपी तेथून निघून गेला, असे फिर्यादीत नमूद करण्यात आले आहे.
घटनेनंतर संतोष चंदनशिवे यांनी हा प्रकार पेट्रोलपंप मालक रत्नदीप कांबळे आणि आपल्या भावाला सांगितला. त्यानंतर त्यांनी शिरूर पोलिस ठाण्यात धाव घेत तक्रार दाखल केली. या प्रकरणी शिरूर पोलिसांनी आरोपीविरुद्ध अनुसूचित जाती आणि अनुसूचित जमाती (अत्याचार प्रतिबंधक) अधिनियम, १९८९ मधील कलम 3(1)(r), 3(1)(s), 3(2)(va) तसेच भारतीय न्याय संहिता (BNS), 2023 मधील कलम 351(2), 351(3) आणि 352 अन्वये गुन्हा दाखल केला आहे. या प्रकरणाचा पुढील तपास शिरूर विभागाचे पोलीस उपविभागीय अधिकारी करीत आहेत.
