पुणे: दिवसा एसी दुरुस्तीच्या कामासाठी दुकानांची माहिती गोळा करायची आणि रात्री त्याच दुकानांना लक्ष्य करून चोरी करायची, अशी पद्धत वापरणाऱ्या 2 आरोपींना पुणे पोलिसांनी अटक केली आहे. औंध परिसरातील दुकानांमध्ये चोरी केल्याचा त्यांच्यावर आरोप आहे. चतुःशृंगी पोलिसांनी सीसीटीव्ही फुटेजच्या मदतीने या आरोपींचा माग काढला.
हिदायत यासीन उडकेरी आणि तन्वीर यासीन अन्सारी, अशी अटक करण्यात आलेल्या आरोपींची नावे आहेत. दोघेही हडपसरमधील सय्यदनगर परिसरात राहतात. ते एसी दुरुस्तीचे काम करत असल्याने दिवसा वेगवेगळ्या भागांत फिरत असत. याच संधीचा फायदा घेऊन ते दुकानांची पाहणी करत आणि रात्री चोरी करण्यासाठी योग्य वेळ साधत असल्याचे तपासात समोर आले आहे.
औंधमधील एका दुकानात चोरी करताना रोकड मिळाली नाही. त्यानंतर आरोपींनी दुकानातील केक आणि आईस्क्रीम खाल्ल्याची माहितीही तपासादरम्यान समोर आली आहे. चोरी केल्यानंतर पोलिसांना आपला माग काढता येऊ नये, यासाठी ते दुचाकीवरून वेगवेगळ्या मार्गांनी प्रवास करत होते.
आरोपी औंधमधून पिंपरी-चिंचवडमार्गे तळेगावपर्यंत जात आणि त्यानंतर हडपसरमधील सय्यदनगर परिसरात परतत असल्याचे पोलिसांच्या तपासातून स्पष्ट झाले. त्यांच्या हालचालींचा माग काढण्यासाठी पोलिसांनी परिसरातील तसेच संशयित मार्गांवरील सीसीटीव्ही फुटेज तपासले.
या तपासात सुमारे 200 सीसीटीव्ही कॅमेऱ्यांचे फुटेज तपासून आरोपींची ओळख पटवण्यात आली. त्यानंतर सहाय्यक पोलीस निरीक्षक अनिकेत पोते आणि त्यांच्या पथकाने दोघांना अटक केली. चोरीसाठी वापरलेली दुचाकीही पोलिसांनी जप्त केली आहे. या प्रकरणाचा पुढील तपास पोलीस करत आहेत.
