मुंबई: मुंबईच्या आरसीएफ पोलीस ठाणे परिसरात एका संतापजनक घटनेने खळबळ उडाली आहे. एका सराईत गुन्हेगाराने आपल्या पत्नीला घरात कोंडून छळ केल्याचा प्रकार उघड झाला आहे. या क्रूर पतीला पोलिसांनी अटक केली असून, त्याचे नाव अरबाज सय्यद (वय 25) असे आहे. अरबाज सय्यद हा रेकॉर्डवरील सराईत गुन्हेगार आहे. त्याच्यावर चोरी, हाणामारी आणि धमकावण्यासारखे तब्बल 19 गंभीर गुन्हे विविध पोलीस ठाण्यांत आधीच दाखल आहेत.
मिळालेल्या माहितीनुसार, किरकोळ वादावरून अरबाजने पत्नीला मारहाण केली. त्याने तलवारीचा धाक दाखवून आणि तोंडावर ॲसिड फेकण्याची धमकी देऊन तिला तब्बल 4 तास घरात ‘कोंबडा’ बनवून ठेवले होते. पत्नी जीव वाचून कशीबशी माहेरी गेली.
पत्नी माहेरी गेल्याचे कळताच आरोपी अरबाजचा राग अनावर झाला. तो पत्नीच्या माहेरच्या घरी पोहोचला आणि त्याने घरात घुसून थेट पत्नीवर चाकूने प्राणघातक हल्ला केला, ज्यामुळे ती गंभीर जखमी झाली. पीडित कुटुंबीयांनी तत्काळ पोलिसांना बोलावले. पोलिसांनी तातडीने धाव घेऊन आरोपीला बेड्या ठोकल्या. पोलिसांनी या घटनेनंतर विविध गंभीर कलमांखाली गुन्हा दाखल केला असून, सध्या या प्रकरणाचा सखोल तपास सुरू आहे.
