पुणे: पुण्यातील कोंढवा भागात कौटुंबिक वादातून एका तरुणावर सासरच्या लोकांनी जीवघेणा हल्ला केल्याची धक्कादायक घटना समोर आली आहे. आपल्या पत्नी आणि मुलाला भेटण्यासाठी गेलेल्या जावयाला मारहाण करून गंभीर जखमी केल्यामुळे परिसरात मोठी खळबळ उडाली आहे. या प्रकरणी पोलिसांनी गुन्हा दाखल केला असून आरोपींचा शोध सुरू आहे.
मिठानगर येथे राहणारे २६ वर्षीय रिझवान राजअहमद शेख ११ जुलै रोजी रात्री आपल्या पत्नी आणि मुलाची भेट घेण्यासाठी सासरी गेले होते. मात्र, रिझवान तेथे पोहोचताच जुन्या वादाचे निमित्त काढून सासरच्या मंडळींनी त्यांच्याशी भांडण सुरू केले. त्यांना शिवीगाळ करण्यात आली, ज्यामुळे रिझवान अपमानित होऊन तिथून परत आपल्या घरी निघून आले.
घरी आल्यानंतरही अकबर युसूफ खान याने रिझवान यांना फोन करून पुन्हा शिवीगाळ करण्यास सुरुवात केली. झालेला अपमान आणि फोनवरील शिवीगाळीचा जाब विचारण्यासाठी रिझवान पुन्हा एकदा सासरच्या घरी गेले. यावेळी वाद अधिकच विकोपाला गेला आणि मेहुणा मोईन अकबर खान याने हातातील ‘फायटर’चा वापर करून रिझवान यांच्यावर हल्ला केला. त्याने रिझवान यांच्या नाकावर आणि डोक्यावर जोरदार प्रहार केले. या हिंसक हल्ल्यात रिझवान यांच्या नाकाचे हाड फॅक्चर झाले असून ते गंभीर जखमी झाले आहेत.
या घटनेनंतर रिझवान यांनी केलेल्या तक्रारीवरून पोलिसांनी अकबर खान, अकबर युसूफ खान आणि मोईन अकबर खान या तिघांविरुद्ध गंभीर गुन्हा दाखल केला आहे.
