महाराष्ट्र: महाराष्ट्रातील पाणीटंचाईवर कायमस्वरूपी उपाय शोधण्यासाठी कोकणातील अतिरिक्त पाणी दुष्काळी भागाकडे वळवण्याचा प्रस्ताव चर्चेत आला आहे. दरवर्षी पावसाळ्यात कोकणात मोठ्या प्रमाणात पाऊस पडतो. त्यातील काही पाणी पुराच्या रूपाने वाहून समुद्राला मिळते. हेच अतिरिक्त पाणी साठवूनपश्चिम घाटाच्या पूर्वेकडील दुष्काळी भागात नेण्याची कल्पना मांडण्यात आली आहे.
‘किसान आर्मी’चे नेते प्रफुल्ल कदम यांनी राज्य सरकारसमोर ‘वॉटर लिंक टनेल’ उभारण्याची मागणी केली आहे. या प्रस्तावानुसार पश्चिम घाटाखालून मोठा भूमिगत बोगदा तयार करून कोकणातील अतिरिक्त पाणी मराठवाडा आणि इतर दुष्काळी भागात पोहोचवण्याचा विचार आहे.
या योजनेत कोकणातील सुमारे 249.43 TMC अतिरिक्त पाणी वळवण्याची मागणी करण्यात आली आहे. हा प्रस्ताव प्रत्यक्षात आला तर मराठवाड्यासह उत्तर महाराष्ट्र आणि पश्चिम महाराष्ट्रातील पाण्याची कमतरता असलेल्या भागांना त्याचा फायदा होऊ शकतो, असा दावा करण्यात आला आहे.
भूमिगत बोगद्याच्या माध्यमातून पाणी नेल्यास उघड्या कालव्याच्या तुलनेत बाष्पीभवनाचे प्रमाण कमी ठेवता येऊ शकते. तसेच आवश्यकतेनुसार हे पाणी संबंधित धरणांमध्ये पोहोचवण्याची कल्पना या प्रस्तावात मांडण्यात आली आहे. मुंबई-पुणे एक्स्प्रेस वेवरील ‘मिसिंग लिंक’च्या धर्तीवर आधुनिक तंत्रज्ञानाचा वापर करण्याची सूचना करण्यात आली आहे.
दरम्यान, राज्यातील पाणीटंचाईवर नदीजोड प्रकल्प राबवण्याबाबत मुख्यमंत्री देवेंद्र फडणवीस यांनीही भूमिका मांडली आहे. ज्या भागात मोठ्या प्रमाणात पाऊस पडतो, तेथील पाणी कमी पाऊस असलेल्या भागात नेण्याचे नियोजन सुरू असल्याचे त्यांनी सांगितले आहे. त्यामुळे कोकणातील अतिरिक्त पाणी दुष्काळी भागात वळवण्याच्या या प्रस्तावावर सरकारकडून काय निर्णय घेतला जातो, याकडे आता लक्ष लागले आहे.
