जिद्द व चिकाटीच्या जोरावर हर्षदा राऊतचे नीट परिक्षेत दैदीप्यमान यश

दीपक खिलारे

इंदापूर : कोणतीही शिकवणी न लावता केवळ ऑनलाइन अभ्यासक्रमाचा लाभ घेऊन घरी अभ्यास करून नीट परीक्षेत कठोर परिश्रम, जिद्द व चिकाटीच्या जोरावर हर्षदा अरुण राऊत हिने नीट परीक्षेत 720 पैकी 660 गुण प्राप्त करून घवघवीत यश मिळवले आहे. इंदापूर येथील श्री नारायणदास रामदास हायस्कूल मधील सहशिक्षक अरुण राऊत यांची हर्षदा ही कन्या आहे. तिने मिळवलेल्या यशाबद्दल तीचे सर्वत्र कौतुक होत आहे.

हर्षदा हिचे दहावीपर्यंतचे शिक्षण श्री नारायणदास रामदास इंग्लिश मीडियम स्कूल तर, बारावी पर्यंतचे शिक्षण श्री नारायणदास रामदास हायस्कूल व ज्युनिअर कॉलेज इंदापूर येथे झाले. तिला दहावीमध्ये 94.60 टक्के तर बारावीमध्ये 91.87 टक्के गुण मिळाले असून दोन्ही वेळेस तिने प्रथम क्रमांक पटकवला आहे.

गेल्या वर्षी तिला नीट परीक्षेमध्ये 560 गुण मिळाले होते. मात्र तिचा शासकीय कॉलेजमध्ये एमबीबीएससाठी नंबर न लागल्यामुळे खचून न जाता तिने जोमाने घरीच अभ्यास करत पुन्हा एकदा यश संपादन केले. हर्षदा हिने संपादन केलेल्या उज्वल यशाबद्दल माजी सहकार व संसदीय कामकाज मंत्री व इंदापूर तालुका शिक्षण प्रसारक मंडळाचे अध्यक्ष हर्षवर्धन पाटील, संस्थेच्या उपाध्यक्षा पद्माताई भोसले, सचिव मनोहर चौधरी व संस्थेचे सर्व संचालक यांनी तिचे अभिनंदन केले व पुढील शैक्षणिक वाटचालीस शुभेच्छा दिल्या.