संतोष पवार
पळसदेव (इंदापूर) : पळसदेव (इंदापूर) येथील श्री पळसनाथ विद्यालयातील हरीश दीपक डोंबाळे या खेळाडूने राज्यस्तरीय सायकलिंग स्पर्धेत प्रथम क्रमांक मिळविला. त्याची नॅशनल (राष्ट्रीय) सायकलिंग स्पर्धेसाठी निवड झाल्याची माहिती विद्यालयाचे प्राचार्य विकास पाठक यांनी दिली. महाराष्ट्र राज्य सायकलिंग असोसिएशन द्वारा तिसऱ्या राज्यस्तरीय सायकलिंग चॅम्पियनशिप स्पर्धा दिनांक १८ ते २० ऑक्टोबर २०२४ या कालावधीत शिवछत्रपती क्रीडा संकुल म्हाळुंगे- बालेवाडी (पुणे) या ठिकाणी संपन्न झाल्या.
या राज्यस्तरीय सायकलिंग टीम स्प्रींट स्पर्धेत प्रथम क्रमांक मिळवत श्री पळसनाथ विद्यालयाच्या हरीश दीपक डोंबाळे या खेळाडूने सुवर्णपदक (गोल्ड मेडल) पटकावले तसेच राज्यस्तरीय टाईम ट्रायल सायकलिंग स्पर्धेत चमकदार कामगिरी करत रौप्यपदक मिळवले. त्याची दिनांक १६ ते २० नोव्हेंबर या कालावधीत चेन्नई येथे ठिकाणी होणाऱ्या राष्ट्रीय सायकलिंग स्पर्धेसाठी (नॅशनल) निवड झालेली आहे.
यापूर्वीही राष्ट्रीय शालेय आणि फेडरेशनच्या नॅशनल साइकलिंग स्पर्धेत हरिश डोंबाळे सुवर्णपदक विजेता ठरला होता. हरीशच्या सायकलिंग स्पर्धेतील यशाबद्दल त्याचे आणि मार्गदर्शक क्रीडाशिक्षकांचे पळसनाथ शिक्षण प्रसारक मंडळाचे अध्यक्ष भूषण काळे, सचिव योगिराज काळे, संस्थेचे सर्व पदाधिकारी, विद्यालयाचे प्राचार्य विकास पाठक पर्यवेक्षक संजय जाधव यांनी अभिनंदन केले आणि पुढील स्पर्धेसाठी शुभेच्छा दिल्या.
