अक्षय टेमगिरे
शिक्रापूर : रात्रीच्या अंधाराचा फायदा घेत मोबाईल शॉपीचे कुलूप तोडून चोरी करणाऱ्या सराईत चोरट्याला शिक्रापूर पोलिसांनी अटक केली असून, त्याच्यासोबत एका अल्पवयीन विधी संघर्षग्रस्त बालकाला ताब्यात घेण्यात आले आहे. अशोक विलास उर्फ राजेंद्र भोसले, वय २४, रा. विठ्ठलवाडी, देहूगाव, ता. खेड, असे अटक केलेल्या आरोपीचे नाव आहे. त्याच्याकडून चोरीचे तीन मोबाईल आणि गुन्ह्यात वापरलेली मोटारसायकल असा सुमारे ४७ हजार रुपयांचा मुद्देमाल जप्त करण्यात आला आहे.
शिक्रापूर येथील शिवराज मोबाईल शॉपीचे मालक संतोष विश्वनाथ सानप यांनी याबाबत शिक्रापूर पोलिस ठाण्यात फिर्याद दिली होती. २३ जुलैच्या रात्री दहा ते २४ जुलैच्या सकाळी नऊ वाजण्याच्या दरम्यान चोरट्याने दुकानाचे कुलूप तोडून आत प्रवेश केला. त्यानंतर मोबाईल व इतर अॅक्सेसरीज असा १७ हजार ६०० रुपयांचा ऐवज चोरून नेला होता. गुन्ह्याचे गांभीर्य लक्षात घेऊन पोलीस निरीक्षक चंद्रशेखर यादव यांनी गुन्हे शोध पथकाला आरोपीचा शोध घेण्याच्या सूचना दिल्या. त्यानुसार पोलिसांनी परिसरातील सीसीटीव्ही फुटेज तपासण्यासह गोपनीय बातमीदारांचे जाळे आणि तांत्रिक विश्लेषणाच्या आधारे तपास सुरू केला.
तपासादरम्यान संशयित अशोक भोसले याच्या हालचालींवर पोलिसांनी पाळत ठेवली आणि त्याला ताब्यात घेतले. चौकशीत अशोक भोसले याने मोबाईल शॉपीमध्ये चोरी केल्याची कबुली दिली. ही चोरी त्याने एका विधी संघर्षग्रस्त साथीदाराच्या मदतीने केल्याचे तपासात समोर आले आहे. त्याच्याकडून चोरीतील तीन मोबाईल तसेच चोरीसाठी वापरलेली मोटारसायकल जप्त करण्यात आली आहे.
दरम्यान, चौकशीमध्ये आरोपीने शिक्रापूर गावच्या हद्दीतील एका मेडिकल दुकानातही चोरी केल्याची कबुली दिल्याने पोलिसांच्या तपासात आणखी एक चोरीचा गुन्हा उघडकीस आला आहे. पोलिसांनी आरोपीकडून एकूण दोन चोरीचे गुन्हे उघडकीस आणले आहेत. अशोक भोसले हा सराईत चोरटा असून, त्याच्याविरुद्ध यापूर्वी चिखली पोलीस ठाणे, पिंपरी-चिंचवड येथे गुन्हा दाखल असल्याची माहिती पोलिसांनी दिली आहे.
ही कारवाई पोलीस अधीक्षक संदिपसिंह गिल्ल, अपर पोलीस अधीक्षक डॉ. शुभम कुमार आणि शिरूर विभागाचे उपविभागीय पोलीस अधिकारी रविंद्र भोसले यांच्या मार्गदर्शनाखाली पोलीस निरीक्षक चंद्रशेखर यादव, पोलीस उपनिरीक्षक उमाकांत कुंजीर, श्रेणी पोलीस उपनिरीक्षक जितेंद्र पानसरे, पोलीस हवालदार गणेश कर्पे, रोहीदास पारखे, श्रीमंत होनमाने, अमोल दांडगे, शिवाजी चितारे, अमोल नलगे तसेच पोलीस कॉन्स्टेबल नारायण वाळके, राम जाधव आणि मच्छिंद्र निचीत यांच्या पथकाने केली आहे. या गुन्ह्याचा पुढील तपास शिक्रापूर पोलीस स्टेशनचे पोलीस निरीक्षक चंद्रशेखर यादव यांच्या मार्गदर्शनाखाली पोलीस हवालदार गणेश कर्पे हे करीत आहेत.
