इंदापूर, ता. 6 : घरातील आजी झोपेत असताना तिच्या डब्यात ठेवलेले तीन तोळ्यांचे सोन्याचे मंगळसूत्र चोरून तिघे पसार झाल्याची घटना व्याहाळी (ता. इंदापूर) येथे 3 ऑक्टोबर रोजी रात्री घडली. विशेष म्हणजे, चोरी करून पळून जाणाऱ्या तिघांना आजीच्या नातवाने पाहिल्याचा दावा केला आहे. याप्रकरणी इंदापूर पोलिस ठाण्यात तिघांविरुद्ध गुन्हा दाखल करण्यात आला आहे.
याबाबत सिद्धनाथ अंकुश माने (वय 31 , रा. व्याहाळी) यांनी फिर्याद दिली आहे. त्यानुसार अशोक उर्फ लिंग्या नामदेव शिंदे, तुषार नानासाहेब सोलनकर आणि जिंदाल काळे (पूर्ण नाव माहीत नाही, तिघे रा. व्याहाळी) यांच्यावर चोरीचा गुन्हा दाखल करण्यात आला आहे.
पोलिसांच्या माहितीनुसार, माने कुटुंबीय हे 3 ऑक्टोबर रोजी रात्री घरात झोपले होते. त्यांची आजी केशर माने (वय 75 ) आणि आजोबा सुखदेव माने हे जवळच सुरू असलेल्या नवीन बांधकामाच्या घरात झोपले होते. या घराला अद्याप दरवाजे व खिडक्या बसविण्यात आलेल्या नाहीत. रात्री दोनच्या सुमारास आजीने आवाज दिल्याने सिद्धनाथ बाहेर आले. त्यावेळी त्यांनी घराजवळून अशोक शिंदे आणि अन्य दोघांना पळून जाताना पाहिले.
यानंतर आजीने डब्यात ठेवलेले तीन तोळ्यांचे सोन्याचे मंगळसूत्र चोरीला गेल्याचे सांगितले. या मंगळसूत्राची किंमत सुमारे साडेचार लाख रुपये असल्याचे फिर्यादीत नमूद करण्यात आले आहे. चोरीप्रकरणी सिद्धनाथ माने यांनी 5 ऑक्टोबर रोजी पोलिसांत तक्रार दिली. पूढील तपास पोलीस हवालदार चंदनशिवे करीत आहेत.
