उरुळी कांचन, (पुणे) : डाळिंब (बन) (ता. दौंड) येथील श्री विठ्ठल देवस्थान येथे आषाढी एकादशीनिमित्त शनिवारी (ता. 25) विठ्ठलाची महापूजा व विविध धार्मिक कार्यक्रमांचे भव्य आयोजन करण्यात आले आहे. अशी माहिती श्री विठ्ठल देवस्थान डाळिंब (बन) ट्रस्टचे अध्यक्ष राजेंद्र ज्ञानोबा कांचन यांनी दिली.
सदरची महापूजा शिरूर-हवेलीचे आमदार ज्ञानेश्वर उर्फ माउली (आबा) कटके यांच्या शुभहस्ते होणार असून, कार्यक्रमाच्या अध्यक्षस्थानी दौंडचे आमदार राहुल कुल हे उपस्थित राहणार आहेत. तसेच माजी आमदार रमेशआप्पा थोरात यांची विशेष प्रमुख उपस्थिती लाभणार आहे.
आषाढी एकादशीनिमित्त दिवसभरात विविध भक्तिमय कार्यक्रमांचे आयोजन करण्यात आले आहे. पहाटे चार ते सहाच्या दरम्यान काकडआरती, श्री विठ्ठलाची मुख्य महापूजा, दुपारी बारा ते एक दरम्यान श्रींच्या पालखीची भव्य मिरवणूक (डाळिंब गाव ते विठ्ठल मंदिर बन) या ठिकाणी काढण्यात येणार आहे. मंडपामध्ये विविध गावांचा भजनाचा कार्यक्रम, विविध गावांचे ढोल-लेझिम पथक प्रात्यक्षिके, सायंकाळी हरिपाठ, कीर्तन (श्री विठ्ठल आध्यात्मिक वारकरी शिक्षण संस्था, डाळिंब), व श्री माऊली कृपा कला नाट्यमंडळ, जांबुत (ता. शिरूर) यांचा भजनी भारुडाचा खास कार्यक्रम होणार आहे.
दरम्यान, या सोहळ्याला दौंडचे तहसीलदार अथर्व शेलार, गटविकास अधिकारी अरुण मरभळ, उरुळी कांचन देवस्थान ट्रस्टचे अध्यक्ष ज्ञानोबा कांचन यांच्यासह विविध गावातील मान्यवर, अधिकारी, पदाधिकारी व ग्रामस्थ यांच्यासह विविध क्षेत्रांतील प्रमुख पाहुणे उपस्थित राहणार आहेत. डाळिंब व परिसरातील सर्व विठ्ठलभक्तांनी व वारकऱ्यांनी या भक्तिमय सोहळ्याचा व दर्शनाचा लाभ घ्यावा, असे निमंत्रण आयोजकांच्या वतीने करण्यात आले आहे.
