लोणी काळभोर, ता.17: इंग्रजी साहित्याची समृद्ध परंपरा, वाचन संस्कृती आणि सर्जनशीलतेचा अनोखा संगम घडवून आणणाऱ्या २६व्या आंतरराष्ट्रीय ‘इंग्लिश रीड फेस्ट 2026’मध्ये श्री स्वामी विवेकानंद शिक्षण संस्था, कोल्हापूर संचलित लोणी काळभोर (ता.हवेली) येथील कन्या प्रशालेच्या विद्यार्थिनींनी उल्लेखनीय कामगिरी केली. या स्पर्धेत प्रशालेने द्वितीय क्रमांक पटकावत आपल्या यशाचा ठसा उमटवला. विद्यार्थिनींच्या या यशामुळे कन्या प्रशालेच्या शिरपेचात मानाचा तुरा रोवला गेला आहे.
लोणी काळभोर येथील एम.आय.टी. आर्ट्स, डिझाईन अँड टेक्नॉलॉजी युनिव्हर्सिटी, पुणे येथे 7 ते 10 ऑक्टोबरदरम्यान 26वी आंतरराष्ट्रीय आणि 56वी वार्षिक ELTAI परिषद आयोजित करण्यात आली होती. इंग्रजी भाषेतील साहित्याचे वाचन वाढावे, विद्यार्थ्यांमध्ये वाचनाची आवड निर्माण व्हावी आणि वाचन संस्कृती रुजावी, या उद्देशाने या परिषदेदरम्यान इंग्रजी साहित्यावर आधारित विविध स्टॉल्स उभारण्यात आले होते.
या स्पर्धेत कथा, कादंबरी, नाटक, कविता, काल्पनिक तसेच रहस्यमय साहित्यप्रकारांचे सादरीकरण करण्यात आले. सीबीएसई आणि आयसीएसई बोर्डाच्या शाळांसह विविध शाळांनी या उपक्रमात सहभाग घेतला होता. दररोज सुमारे 30 स्टॉल्सच्या माध्यमातून विद्यार्थ्यांनी आपली कल्पकता आणि सादरीकरण कौशल्य दाखवून दिले.
कन्या प्रशालेच्या विद्यार्थिनींनी इंग्रजी नाटकाचा मध्ययुगीन कालखंडापासून एलिझाबेथन, व्हिक्टोरियन आणि रोमँटिक कालखंडापर्यंतचा, तसेच आधुनिक काळापर्यंतचा ऐतिहासिक प्रवास विविध प्रतिकृतींच्या माध्यमातून प्रभावीपणे साकारला. साहित्याचा अभ्यास, कालखंडानुसार नाटकांमध्ये झालेले बदल आणि कल्पक मांडणी यांचा सुरेख मेळ त्यांच्या सादरीकरणात पाहायला मिळाला. या वैशिष्ट्यपूर्ण सादरीकरणामुळे प्रशालेने स्पर्धेत द्वितीय क्रमांक मिळवला.
या यशस्वी सादरीकरणात इयत्ता नववीतील सई गिरी, सुप्रिया चव्हाण, ज्ञानेश्वरी चव्हाण, श्रद्धा माने, पौर्णिमा लोमटे, वैभवी तावरे, समीक्षा कुंभार आणि श्रेया येवतीकर या आठ विद्यार्थिनी सहभागी झाल्या होत्या. त्यांना इंग्रजी विषयाच्या सहशिक्षिका वर्षाराणी पाटील यांनी मार्गदर्शन केले, तर अश्विनी मोकाशी यांनी सहकार्य केले.
विद्यार्थिनींच्या या यशाबद्दल कन्या प्रशालेच्या मुख्याध्यापिका सौ. सुजाता भालेराव यांनी आनंद व्यक्त केला. ही कामगिरी प्रशालेसाठी अभिमानास्पद असल्याचे सांगत त्यांनी सर्व यशस्वी विद्यार्थिनींचे अभिनंदन केले आणि त्यांच्या पुढील शैक्षणिक वाटचालीसाठी शुभेच्छा दिल्या. दरम्यान इंग्रजी साहित्याची जाण, कल्पक सादरीकरण आणि सांघिक प्रयत्नांच्या जोरावर कन्या प्रशालेच्या विद्यार्थिनींनी मिळवलेले हे यश इतर विद्यार्थ्यांसाठीही प्रेरणादायी ठरले आहे.
