पुणे : पुण्यातून एक अत्यंत धक्कादायक घटना समोर आली आहे. खासगी सावकारांच्या त्रासाला कंटाळून एका 34 वर्षांच्या तरुण कापड व्यावसायिकाने गळफास घेऊन स्वतःचे जीवन संपवले. मूळ कर्ज आणि त्याचे प्रचंड व्याज मिळून 1 कोटी 13 लाख 57 हजार रुपये परत केले तरी सावकारांचा तगादा आणि छळ थांबत नव्हता. याप्रकरणी चंदननगर पोलिसांनी पाच जणांवर गुन्हा दाखल केला आहे.
मिळालेल्या माहितीनुसार, रवींद्र सुभाष आसालकर (वय 34, रा. वडगाव शेरी, पुणे) असे आत्महत्या केलेल्या व्यावसायिकाचे नाव आहे. याप्रकरणी त्यांचे भाऊ महेश आसालकर (वय 38) यांनी तक्रार दिली आहे. त्यावरून सावकार सुरेश रामकृष्ण जायभाये (वय 43, रा. वाघोली), अमित रघुनाथ सातव (वय 31, रा. आव्हाळवाडी), शिरीष प्रभाकर गायकवाड (वय 50, रा. विश्रांतवाडी), मंजिरी अमित कुलकर्णी (वय 49, रा. प्रभात रोड) आणि आव्हाळे नावाच्या व्यक्तीविरोधात गुन्हा नोंदवण्यात आला आहे.
रवींद्र आणि त्यांचे भाऊ वाघोली येथे कापड विक्रीचा व्यवसाय करत होते. व्यवसायासाठी बँकेकडून कर्ज न मिळाल्याने त्यांनी या सावकारांकडून दरमहा 3 ते 5 टक्के व्याजाने कर्ज घेतले होते. सुरुवातीला जायभाये याच्याकडून 47 लाख 80 हजार रुपये, तर नंतर मंजिरी कुलकर्णी यांच्याकडून 10 लाख, अमित सातव यांच्याकडून 16 लाख आणि शिरीष गायकवाड यांच्याकडून 10 लाख रुपये घेतले होते.
व्यवसाय अडचणीत आल्यानंतरही आसालकर यांनी व्याजासह एकूण 1 कोटी 13 लाख 57 हजार रुपये परत केले. तरीही आरोपींनी त्यांना पैशांसाठी वारंवार धमकावणे सुरूच ठेवले. मुख्य आरोपी जायभाये याने रवींद्र यांचे राहते घर आणि गाडी स्वतःच्या नावावर करून घेण्यासाठी दबाव आणला होता.
सततचा मानसिक त्रास, जीवे मारण्याच्या धमक्या आणि ब्लॅकमेलिंगमुळे वैतागून रवींद्र यांनी 20 जुलै रोजी राहत्या घरी गळफास घेतला. घटनेपूर्वी त्यांनी लिहिलेल्या सुसाईड नोटमध्ये सर्व आरोपींच्या जाचाचा स्पष्ट उल्लेख केला आहे. या आधारे पोलीस उपनिरीक्षक भरसट पुढील तपास करत आहेत.
