लोणी काळभोर, ता. १३ : लोणी काळभोर आणि परिसरात दहशत निर्माण करून नागरिकांना त्रास देणाऱ्या अट्टल गुन्हेगारावर लोणी काळभोर पोलिसांनी कठोर कारवाई केली आहे. सराईत गुन्हेगार गणेश बाळासाहेब विरकर याला पुणे शहर, पिंपरी-चिंचवड आणि पुणे जिल्ह्याच्या हद्दीतून सहा महिन्यांसाठी तडीपार करण्यात आले आहे. या कारवाईमुळे परिसरातील नागरिकांनी समाधान व्यक्त करत लोणी काळभोर पोलिसांच्या कामगिरीचे कौतुक केले आहे.
गणेश बाळासाहेब विरकर (वय ४०, रा. रुपनर वस्ती, लोणी काळभोर, ता. हवेली, जि. पुणे) असे तडीपार करण्यात आलेल्या आरोपीचे नाव आहे. पोलिसांनी दिलेल्या माहितीनुसार, गणेश विरकर हा परिसरात वारंवार दहशत निर्माण करून सामान्य नागरिकांना त्रास देत होता. त्याच्या कृत्यांमुळे नागरिकांच्या जीवितास धोका निर्माण झाला होता. त्याच्याविरोधात लोणी काळभोर पोलीस ठाण्यात भारतीय न्याय संहिता २०२३ अंतर्गत कलम ३५२, ३५१ (२), ३५१ (३), ११८ (१), ११५ (२), १२५ व ३ (५) अन्वये गुन्हे दाखल आहेत.
सराईत गुन्हेगारांच्या वाढत्या कृत्यांमुळे कायद्याविषयी नागरिकांच्या मनात संभ्रम निर्माण होऊ नये आणि गुन्हेगारीवर प्रभावी नियंत्रण ठेवता यावे, यासाठी लोणी काळभोर पोलिसांनी महाराष्ट्र पोलीस अधिनियमाच्या कलम ५६ अन्वये गणेश विरकर याच्याविरोधात तडीपारीचा प्रस्ताव तयार केला होता. सदर प्रस्तावाचा अभिलेख तपासून पुणे शहराचे पोलीस आयुक्त अमितेश कुमार यांनी तो मंजूर केला.
त्यानुसार गणेश विरकर याला पुणे शहर, पिंपरी-चिंचवड आणि पुणे जिल्ह्याच्या हद्दीतून सहा महिन्यांसाठी तडीपार करण्याचे आदेश देण्यात आले आहेत. या कारवाईमुळे परिसरातील गुन्हेगारी प्रवृत्तीच्या व्यक्तींमध्ये धाक निर्माण झाला असून, सामान्य नागरिकांनी लोणी काळभोर पोलिसांच्या धाडसी आणि प्रभावी कारवाईचे स्वागत केले आहे.
ही कामगिरी लोणी काळभोर पोलीस ठाण्याचे वरिष्ठ पोलीस निरीक्षक प्रदीप पवार यांच्या मार्गदर्शनाखाली पोलीस हवालदार विलास शिंदे, वैजनाथ शेलार पोलीस अंमलदार प्रशांत नरसाळे व महिला पोलीस अंमलदार योगिता भोसुरे यांच्या पथकाने केली आहे.
