पुणे : चंदननगर परिसरात केवळ 600 रुपयांसाठी मित्रानेच मित्राचा जीव घेतल्याची धक्कादायक घटना समोर आली आहे. उसन्या पैशांवरून सुरू झालेला वाद वाढला आणि त्यानंतर आरोपीने धारदार चाकूने हल्ला केल्याचे पोलिसांच्या तपासात समोर आले आहे. या घटनेमुळे परिसरात खळबळ उडाली आहे. या हल्ल्यात राहुल राजेंद्र जंवाजाळ (वय 22, रा. बोराटे वस्ती, चंदननगर) याचा मृत्यू झाला. या प्रकरणी चंदननगर पोलिसांनी आशिष डेव्हिड मगर (वय 27, रा. येरवडा) याला अटक केली आहे. आरोपी एका खासगी कंपनीत डिलिव्हरी बॉय म्हणून काम करत असल्याची माहिती पोलिसांनी दिली.
पोलिसांच्या माहितीनुसार, राहुल आणि आशिष यांची जुनी मैत्री होती. काही दिवसांपूर्वी आशिषने राहुलला 600 रुपये उसने दिले होते. हे पैसे परत मिळावेत यासाठी तो वारंवार राहुलकडे मागणी करत होता. मात्र, पैसे देण्यास टाळाटाळ होत असल्याने दोघांमध्ये वाद वाढला.
8 सप्टेंबर रोजी सायंकाळी साडेसातच्या सुमारास बोराटे वस्ती परिसरात दोघांची पुन्हा भेट झाली. यावेळी 600 रुपयांवरून त्यांच्यात वाद झाला. पैशांवरून राहुलने आशिषला आईवरून शिवीगाळ केल्याचे सांगितले जाते. त्यामुळे संतापलेल्या आशिषने जवळील धारदार चाकू काढून राहुलवर वार केले. हल्ल्यात राहुल गंभीर जखमी झाला. त्याचा मृत्यू झाल्यानंतर पोलिसांनी तपास सुरू करून आरोपीला ताब्यात घेतले. या घटनेचा पुढील तपास गुन्हे शाखेचे पोलीस निरीक्षक अमोल साळुंखे करत आहेत.
