इम्रान अत्तार
भोर: भोरचे ज्येष्ठ नेते, माजी मंत्री आणि सहा वेळा आमदार राहिलेले अनंतराव थोपटे यांच्यावर शुक्रवारी सकाळी शासकीय इतमामात अंत्यसंस्कार करण्यात आले. त्यांच्या पार्थिवावर अनंतराव थोपटे महाविद्यालयाच्या प्रांगणात शोकाकुल वातावरणात अंत्यविधी पार पडला. राज्याच्या राजकीय, सामाजिक तसेच शैक्षणिक क्षेत्रातील मान्यवरांनी उपस्थित राहून त्यांना अखेरचा निरोप दिला. अनंतराव थोपटे यांचे वयाच्या ९३ व्या वर्षी निधन झाल्याने पुणे जिल्ह्यासह राज्यभरातून हळहळ व्यक्त करण्यात आली होती.
अंत्ययात्रेदरम्यान ‘विठ्ठल-विठ्ठल’ नामघोष आणि घोषणांनी परिसर दुमदुमून गेला. नागरिक, कार्यकर्ते, मित्रपरिवार आणि विविध पक्षांचे नेते मोठ्या संख्येने उपस्थित होते. महाराष्ट्र पोलिस दलाच्या वतीने त्यांना शासकीय मानवंदना देण्यात आली. बंदुकींच्या फैरी आणि शोकधून वाजवत पोलिसांनी आपल्या आदरांजली अर्पण केली.
अनंतराव थोपटे यांनी भोर मतदारसंघाचे अनेक वर्षे प्रतिनिधित्व करत शिक्षण, सहकार आणि ग्रामीण विकास क्षेत्रात महत्त्वपूर्ण योगदान दिले. त्यांच्या कार्यकाळात अनेक विकासकामे मार्गी लागली. साधी राहणी, लोकांशी असलेला जिव्हाळ्याचा संबंध आणि काँग्रेस विचारधारेप्रती असलेली निष्ठा यामुळे ते जनतेच्या मनात विशेष स्थान निर्माण करू शकले.
अंत्यसंस्कारावेळी उपस्थित मान्यवरांनी त्यांच्या कार्याचा गौरव करत त्यांच्या आठवणींना उजाळा दिला. त्यांच्या निधनाने भोर तालुक्याच्या राजकीय आणि सामाजिक क्षेत्रातील एक मोठे पर्व संपल्याची भावना उपस्थितांनी व्यक्त केली.
