पिंपरी-चिंचवड: पिंपरी-चिंचवडमधील ऐतिहासिक श्री मोरया गोसावी मंदिर परिसरात संकष्टी चतुर्थीनिमित्त भरलेल्या यात्रेत एक धक्कादायक प्रकार समोर आला आहे. महिलेच्या दाव्यानुसार, यात्रेतील एका स्टॉलवरून खरेदी केलेली चादर घरी नेल्यावर, तिला चादरीच्या आत ‘मेड इन पाकिस्तान’ असे लेबल दिसले. येथील यात्रेत विक्रीसाठी ठेवलेल्या चादरीवर ‘मेड इन पाकिस्तान’ असे लेबल होते. महिला चादर खरेदी केल्यानंतर हा संपूर्ण प्रकार उघडकीस आला आहे.
भारत-पाकिस्तानमधील तणावपूर्ण संबंध आणि पाकिस्तानी वस्तूंवर असलेले निर्बंध पाहता, श्री मोरया गोसावी मंदिर परिसरात अशा पवित्र ठिकाणी या वस्तू कशा पोहोचल्या, असा संतप्त सवाल नागरिकांनी उपस्थित केला आहे.
या घटनेमुळे स्थानिक प्रशासन आणि पोलिसांच्या कार्यक्षमतेवर प्रश्नचिन्ह निर्माण झाले आहे. धार्मिक उत्सवाच्या निमित्ताने स्टॉल लावणाऱ्या व्यापाऱ्यांच्या मालाची तपासणी केली जात नाही का, असा प्रश्न नागरिक विचारत आहेत. मात्र, काही सुजाण नागरिकांनी आणि तज्ज्ञांनी या प्रकरणात सावधगिरी बाळगण्याचे आवाहन केले आहे.
सध्याच्या घडीला स्थानिक पोलीस किंवा प्रशासनाकडे या संदर्भात कोणतीही अधिकृत तक्रार नोंदवण्यात आलेली नाही. संबंधित चादर कायदेशीर मार्गाने बाजारात आली आहे की चोरट्या मार्गाने, हे अद्याप स्पष्ट झालेले नाही.
