लोणी काळभोर, ता. ८ : जुन्या वादाचा राग मनात धरून “तू आदित्य मुसळेसोबत भांडण का केले?” असा जाब विचारत एका तरुणावर धारदार शस्त्राने जीवघेणा हल्ला करण्यात आल्याची धक्कादायक घटना मांजरी बुद्रुक परिसरात घडली आहे. या हल्ल्यात दोन तरुण गंभीर जखमी झाले असून त्यांच्यावर ससून रुग्णालयात उपचार सुरू आहेत. या प्रकरणी मांजरी पोलिसांनी आरोपींसह त्यांच्या साथीदारांविरोधात गुन्हा दाखल केला आहे.
विशाल हनुमंत सोनवणे (वय २४, रा. कुंजीरवस्ती, मांजरी बुद्रुक) यांनी याप्रकरणी फिर्याद दिली आहे. त्यानुसार प्रेम परकाळे, धैर्यशील आखाडे आणि त्यांच्या इतर साथीदारांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, विशाल सोनवणे हे ओला-उबरवर रिक्षा चालवून उदरनिर्वाह करतात. शनिवारी (ता. ६) रात्री सुमारे नऊच्या सुमारास विशाल आणि त्यांचा मित्र यश भगत हे अॅक्टिव्हा दुचाकीत पेट्रोल भरण्यासाठी मांजरी-हडपसर रस्त्यावरील रंगीचा ओढा येथील समर्थ पेट्रोल पंपावर गेले होते.
पेट्रोल भरून दोघे निघत असताना तेथे प्रेम परकाळे, धैर्यशील आखाडे आणि त्यांचे काही साथीदार आले. “तू आदित्य मुसळेसोबत भांडण का केले?” असा जाब विचारत त्यांनी विशाल यांना शिवीगाळ करण्यास सुरुवात केली. त्यानंतर धैर्यशील आखाडे व इतरांनी विशाल यांना मारहाण केली. दरम्यान, प्रेम परकाळे याने हातातील धारदार शस्त्राने विशाल सोनवणे यांच्या डाव्या मनगटावर वार केला. विशाल यांना वाचविण्यासाठी पुढे आलेल्या यश भगत यांच्या डाव्या हाताच्या बोटावरही त्याच शस्त्राने वार करण्यात आला. या हल्ल्यात दोघेही जखमी झाले.
जखमी अवस्थेत विशाल सोनवणे यांनी मांजरी पोलीस ठाण्यात धाव घेतली. पोलिसांनी त्यांना उपचारासाठी पाठविले असून सध्या दोघांवर पुण्यातील ससून रुग्णालयात उपचार सुरू आहेत. या प्रकरणी मांजरी पोलिसांनी भारतीय न्याय संहिता कलम 115(2), 118(2), 352, 3(5) तसेच शस्त्र अधिनियम कलम 25(4) आणि महाराष्ट्र पोलीस अधिनियम कलम 37(1), 135 अन्वये गुन्हा दाखल केला असून पुढील तपास सुरू आहे.
