लोणी काळभोर, ता. ८ : इंडसइंड बँकेच्या क्रेडिट कार्ड विभागातून बोलत असल्याचा बनाव करून एका सायबर चोरट्याने ग्राहकाला APK फाईल डाउनलोड करण्यास भाग पाडत त्याच्या मोबाईलचा ताबा मिळवला आणि तीन वेगवेगळ्या क्रेडिट कार्डमधून तब्बल ६ लाख ३९ हजार १९ रुपयांची फसवणूक केल्याची धक्कादायक घटना उघडकीस आली आहे. या प्रकरणी सायबर पोलिसांनी अज्ञात आरोपींविरुद्ध गुन्हा दाखल केला आहे.
प्रवीण प्रल्हाद उंद्रे (वय ४२, रा. बेल्हेकरवस्ती, मांजरी बुद्रुक) यांनी याप्रकरणी सायबर पोलीस ठाण्यात फिर्याद दिली आहे. उंद्रे हे खासगी कंपनीत प्रोडक्शन मॅनेजर म्हणून कार्यरत आहेत. पोलिसांनी दिलेल्या माहितीनुसार, २६ मे रोजी उंद्रे यांना एका अनोळखी क्रमांकावरून फोन आला. समोरच्या व्यक्तीने स्वतःला इंडसइंड बँकेच्या क्रेडिट कार्ड विभागातील अधिकारी असल्याचे सांगितले. तुमच्या क्रेडिट कार्डवर इन्शुरन्स पॉलिसी सक्रिय असून त्यासाठी दरमहा ईएमआय भरावा लागेल, असे सांगण्यात आले. त्यावर उंद्रे यांनी अशी कोणतीही पॉलिसी नको असल्याचे सांगितले.
यानंतर आरोपीने पॉलिसी बंद करण्याच्या बहाण्याने व्हॉट्सॲपवर “Indusind credit card.apk” नावाची फाईल पाठवली. संबंधित फाईल डाउनलोड करून कार्डची माहिती भरताच आरोपीने त्यांच्या मोबाईलचा रिमोट अॅक्सेस मिळवला. त्यानंतर कॉल फॉरवर्डिंगची सुविधा सक्रिय करून ओटीपी स्वतःकडे वळवण्यात आले. या माध्यमातून आरोपींनी एचडीएफसी, स्टेट बँक ऑफ इंडिया आणि इंडसइंड बँकेच्या क्रेडिट कार्डवरून विविध व्यवहार करत ६,३९,०१९ रुपयांची रक्कम लंपास केली. ‘शहादत स्टोअर’, ‘फ्रीचार्ज पेमेंट’, ‘रिलायन्स डिजिटल, मुंबई’ तसेच अन्य खात्यांवरून व्यवहार झाल्याचे तपासात समोर आले आहे.
फसवणुकीचा संशय आल्यानंतर प्रवीण उंद्रे यांनी तातडीने त्यांच्या रिलेशनशिप मॅनेजरशी संपर्क साधून तिन्ही क्रेडिट कार्ड ब्लॉक केले. तसेच राष्ट्रीय सायबर पोर्टलवर तक्रार नोंदवून सायबर पोलिसांकडे धाव घेतली. या प्रकरणी अज्ञात सायबर चोरट्यांविरुद्ध माहिती तंत्रज्ञान अधिनियम कलम ६६(ड) तसेच भारतीय न्याय संहिता कलम ३१८(४), ३१९(२) आणि ३(५) अन्वये गुन्हा दाखल करण्यात आला असून पुढील तपास सायबर पोलीस करीत आहेत.
नागरिकांसाठी सायबर पोलिसांचा इशारा
-कोणतीही APK फाईल डाउनलोड करू नका.
-बँक किंवा क्रेडिट कार्ड कंपनी कधीही फोनवरून OTP किंवा कार्डची माहिती मागत नाही.
-अनोळखी व्यक्तीच्या सांगण्यावरून मोबाईलचे कॉल फॉरवर्डिंग किंवा स्क्रीन शेअरिंग करू नये.
-संशयास्पद व्यवहार झाल्यास त्वरित 1930 हेल्पलाईन किंवा सायबर पोर्टलवर तक्रार नोंदवावी.
