इम्रान आत्तार
भोर (Bhor News) : उत्रौली-वडगावडाळ येथील औद्योगिक वसाहतीच्या बैठकीत गोंधळ झाला. यावेळी काही ग्रामस्थांनी औद्योगिक वसाहत करायला विरोध करून जमिनीवरील शिक्के काढण्याची मागणी करत घोषणाबाजी केली. तर काही ग्रामस्थांनी वसाहतीसाठी सर्वेक्षण करायला संमती दिली. या गोंधळामध्ये बैठक संपवण्यात आली.
प्रस्तावित औद्योगिक वसाहतीच्या भूसंपादनासंदर्भात जिल्हाधिकारी जितेंद्र डूड्डी यांच्या अध्यक्षतेखाली पुणे येथे बैठक झाली. त्यावेळी दोन्ही गावातील शेतकरी उपस्थित होते. त्यावेळी काही शेतकऱ्यांनी औद्योगिक वसाहतीला विरोध केला होता. जिल्हाधिकारी यांनी प्रत्यक्ष गावात जाऊन सर्वेक्षण करण्याच्या सूचना दिल्या होत्या. जिल्हाधिकारी यांच्या सुचनेनुसार औद्योगिक वसाहतीबाबत उत्रौली येथील कार्यालयात बैठक आयोजित करण्यात आली होती.
यावेळी उपविभागीय अधिकारी डॉ. विकास खरात तहसीलदार राजेंद्र नजन, उपविभागीय औद्योगिक वसाहत अधिकारी अर्चना पठारे, जिल्हा परिषद माजी उपाध्यक्ष रणजीत शिवतरे, नवनाथ शेटे, विलास शिवतरे, राजेंद्र शेटे व दोन्ही गावचे ग्रामस्थ उपस्थित होते.
यावेळी औद्योगिक वसाहती संदर्भात उपविभागीय अधिकारी डॉ.विकास खरात यांनी व औद्योगिक वसाहतीच्या अधिकारी अर्चना पठारे यांनी दोन्ही गावातील ग्रामस्थांना वसाहतीबाबत सविस्तर माहिती दिली. मात्र यापूर्वी सर्वेक्षण झाले होते. त्यावेळी 67 टक्के लोकांनी विरोध दर्शवला होता. त्यामुळे पुन्हा सर्वेक्षण करू नये औद्योगिक वसाहतीला आमचा विरोध असून आमच्या जमिनीवरील शिक्के काढा. तसेच आमचा सातबारा कोरा करा अशी घोषणाबाजी काही नागरिकांनी केली.
यामुळे बैठकीत गोंधळ निर्माण झाला. सदर गदारोळातच बैठक संपवण्यात आली. जिल्हाधिकारी यांच्या सूचनेनुसार उत्रौली-वडगावडाळ औद्योगिक वसाहतीबाबत उत्रौली येथील कार्यालयात बैठक झाली. या बैठकीला दोन्ही गावातील नागरिक उपस्थित होते.
बैठकीला काही लोकांनी विरोध केला तर काहींनी संमती दर्शवली असून याबाबत मंडल अधिकारी स्तरावर प्रत्येक शेतकऱ्यांचे वैयक्तिक म्हणणे ऐकून घेऊन सर्वेक्षण करून जिल्हाधिकाऱ्यांना सविस्तर अहवाल पाठवला जाईल.
-डॉ. विकास खरात (उपविभागीय अधिकारी भोर )
