उरुळी कांचन, (पुणे) : उरुळी कांचन-अष्टापूर राज्य मार्गावर अज्ञात वाहनाने दिलेल्या जोरदार धडकेत भवरापूर (ता. हवेली) येथील एका शेतकऱ्याचा उपचारादरम्यान मृत्यू झाला. याप्रकरणी अज्ञात वाहन चालकाविरुद्ध उरुळी कांचन पोलीस ठाण्यात गुन्हा दाखल करण्यात आला आहे. ही घटना 28 मेला सायंकाळी पाऊणे आठ वाजण्याच्या सुमारास गोळीबार मैदान, सटवाई चौक या ठिकाणी ही घटना घडली.
प्रवीण निवृत्ती साठे (वय-55, रा. भवरापूर साठेवस्ती, ता. हवेली) असे उपचारादरम्यान मृत्यू झालेल्या व्यक्तीचे नाव आहे. याबाबत राजकुमार प्रवीण साठे (वय-29, रा. सदर) यांनी उरुळी कांचन पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी राजकुमार साठे यांचे वडील 28 मे ला सायंकाळी सात वाजण्याच्या सुमारास मोटारसायकलवरून गोळीबार मैदान परिसरातील शेतात पाण्याच्या मोटारीचे काम करण्यासाठी गेले होते. काम आटोपून सायंकाळी पाऊणे आठच्या सुमारास भवरापूर-अष्टापूर रोडने माघारी निघाले होते. माघारी येत असताना, सटवाई मंदिर चौकाच्या मागे भवरापूर गावच्या हद्दीत एका अज्ञात भरधाव वाहनाने त्यांच्या मोटारसायकलला पाठीमागून जोरदार धडक दिली.
धडक इतकी कडक होती की, प्रवीण साठे हे गाडीवरून रस्त्यावर कोसळले आणि त्यांच्या डोक्याला, मानेला तसेच छातीच्या बरगडीला गंभीर दुखापत झाली. घटनेची माहिती मिळताच फिर्यादी राजकुमार यांनी ग्रामस्थांच्या मदतीने तातडीने वडिलांना उरुळी कांचन येथील सिद्धिविनायक हॉस्पिटलमध्ये उपचारकामी दाखल केले.
दरम्यान, 14 दिवसांपासून मृत्यूशी झुंज देत असताना अखेर गुरुवारी (ता. 11) सकाळी पाऊणे अकरा वाजता उपचारादरम्यान त्यांचा दुर्दैवी मृत्यू झाल्याचे डॉक्टरांनी घोषित केले. सदर गुन्ह्याचा पुढील तपास पोलीस हवालदार विशाल रासकर हे करत आहेत.
