पुणे: पुण्यात बनावट नोटा तयार करून त्या जवळ बाळगणाऱ्या टोळीवर विश्रामबाग पोलिसांनी कारवाई केली आहे. या प्रकरणात पोलिसांनी 4 जणांना अटक केली असून, त्यांच्याकडून 500 रुपयांच्या एकूण 1,128 बनावट नोटा जप्त केल्या आहेत. या नोटांचे दर्शनी मूल्य 5 लाख 64 हजार रुपये आहे. नोटा तयार करण्यासाठी वापरण्यात येणारा प्रिंटर, संगणक आणि अन्य साहित्यही पोलिसांनी ताब्यात घेतले आहे.
या प्रकरणाची माहिती विश्रामबाग पोलीस ठाण्याच्या तपास पथकाला मिळाली होती. महात्मा फुले मंडई परिसरात एक व्यक्ती बनावट नोटा घेऊन येणार असल्याची माहिती पोलीस हवालदार सचिन अहिवळे आणि शैलेश सुर्वे यांना मिळाली. त्यानंतर पोलीस उपनिरीक्षक सत्यवान गेंड यांनी वरिष्ठ पोलीस निरीक्षक नवनाथ जगताप यांना याबाबत कळवले. वरिष्ठांच्या सूचनेनुसार पोलिसांनी परिसरात सापळा रचला.
14 ऑक्टोबर 2026 रोजी सायंकाळी पावणेपाचच्या सुमारास शुक्रवार पेठेतील महात्मा फुले मंडईच्या मागील बाजूस म्हसोबा मंदिरासमोरील रस्त्यावर पोलिसांनी सलमान जैनद्दीन राजे (30, रा. आंबेगाव, केडगाव, दौंड) याला ताब्यात घेतले. त्याच्याकडून 500 रुपयांच्या 805 बनावट नोटा मिळाल्या. त्यांचे एकूण मूल्य 4 लाख 2 हजार 500 रुपये असल्याचे पोलिसांनी सांगितले.
या प्रकरणी विश्रामबाग पोलीस ठाण्यात गुन्हा क्रमांक 444/2026 नोंदवण्यात आला आहे. भारतीय न्याय संहितेतील कलम 178, 179, 180, 181 आणि 3(5) अंतर्गत गुन्हा दाखल करण्यात आला. सलमानची चौकशी केल्यानंतर आणखी 3 जण सहभागी असल्याची माहिती समोर आली. त्यानुसार पोलिसांनी सातारा आणि कोल्हापूर येथे तपास केला.
या कारवाईत सलमान राजे याच्यासह शाफाज फिरोज अन्सारी (30, नालासोपारा), विशाल विलास गलांडे (37, सातारा) आणि अभिजीत रावसाहेब कांबळे (30, शिरोळ, कोल्हापूर) यांना अटक करण्यात आली आहे. या टोळीच्या कारभाराबाबत पोलीस पुढील तपास करत आहेत.
