बारामती : श्री सोमेश्वर सहकारी साखर कारखान्याच्या पंचवार्षिक निवडणुकीच्या पार्श्वभूमीवर बारामतीतील राजकीय हालचालींना वेग आला आहे. राष्ट्रवादी काँग्रेस पक्ष (शरदचंद्र पवार) गटाच्या वतीने सोमेश्वर कारखाना निवडणुकीसाठी इच्छुक उमेदवारांच्या मुलाखतींना सुरुवात झाली आहे. युवा नेते युगेंद्र पवार यांच्या उपस्थितीत बारामती येथील कृष्णानगर हॉटेलच्या हॉलमध्ये या मुलाखती घेण्यात येत आहेत.

निवडणुकीत पक्षाकडून कोणाला संधी द्यायची, कोणत्या मतदारसंघातून कोणाला उमेदवारी द्यायची आणि संभाव्य पॅनेलची रचना कशी असावी, याबाबत मुलाखतीच्या माध्यमातून माहिती घेतली जात आहे. विविध मतदारसंघांतून मोठ्या संख्येने इच्छुकांनी निवडणूक लढवण्याची तयारी दर्शविल्याने उमेदवारांमध्येही उत्सुकता वाढली आहे.
इच्छुक उमेदवारांचा स्थानिक पातळीवरील जनसंपर्क, कारखान्याच्या सभासदांशी असलेला संपर्क, मतदारसंघातील परिस्थिती आणि निवडणुकीसाठीची तयारी याबाबत पक्षाच्या पदाधिकाऱ्यांकडून माहिती जाणून घेतली जात आहे. उमेदवारी निश्चित झाल्यानंतर पक्षाच्या संभाव्य पॅनेलचे चित्र अधिक स्पष्ट होणार आहे.

दरम्यान, सोमेश्वर कारखाना निवडणुकीसाठी विविध राजकीय गटांकडून मोर्चेबांधणी सुरू झाली आहे. उपमुख्यमंत्री सुनेत्रा पवार यांच्या नेतृत्वाखालील पॅनेल, युगेंद्र पवार यांनी जाहीर केलेले शेतकरी पॅनेल आणि विजय शिवतारे यांच्या नेतृत्वाखालील शिवसेनेचे पॅनेल अशी तिरंगी लढत होण्याची शक्यता व्यक्त केली जात आहे. त्यामुळे ही निवडणूक सहकार क्षेत्रासोबतच बारामती, पुरंदर आणि परिसरातील राजकीय समीकरणांसाठीही महत्त्वाची ठरणार आहे.

दरम्यान, युगेंद्र पवार यांनी पवार विरुद्ध पवार अशी लढत करण्याचा आपला उद्देश नसल्याचे स्पष्ट केले. शेतकरी सभासदांसाठी सक्षम पर्याय उभा करण्यासाठी आपण निवडणुकीच्या मैदानात उतरत असल्याचे त्यांनी सांगितले. सुनेत्रा पवार यांच्याबाबत आक्षेप नसून, सोमेश्वर कारखान्याच्या संचालकांच्या कामकाजाबाबत आपले मतभेद असल्याचे त्यांनी नमूद केले. अनेक वर्षांपासून एकाच कुटुंबाकडे सत्ता असल्याने यंदा बदल घडवण्याची गरज असल्याचे सांगत, संविधानिक मार्गाने हा बदल घडवून आणण्यासाठी निवडणूक लढवणार असल्याचे संकेत त्यांनी दिले.







