लोणी काळभोर, ता. १६ : शेवाळवाडी (ता. हवेली) परिसरात बनावट पोलिसाचा आव आणत दोन भामट्यांनी एका ज्येष्ठ शेतकऱ्याची चालू बाजार भावाप्रमाणे सुमारे १० लाखांच्या रुपयांच्या सोन्याच्या दागिन्यांची फसवणूक केल्याची धक्कादायक घटना १४ जून रोजी दुपारी साडेबारा वाजण्याच्या सुमारास उघडकीस आली आहे. “परिसरात चोरीच्या घटना वाढल्या आहेत, दागिने घालू नका,” असा बहाणा करत विश्वास संपादन करून आरोपींनी दागिने घेऊन पोबारा केला.
विश्वनाथ गोविंदराव शेवाळे (वय ७१, रा. शेवाळवाडी, मांजरी बुद्रुक, ता. हवेली) यांनी याप्रकरणी मांजरी पोलीस ठाण्यात तक्रार दिली आहे. त्यानुसार दोन अज्ञात भामट्यांच्या विरोधात मांजरी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, विश्वनाथ शेवाळे हे पुरातन महादेव मंदिराजवळील त्यांच्या शेत व नर्सरीची पाहणी करण्यासाठी गेले होते. यावेळी एक अनोळखी व्यक्ती दुचाकीवर येऊन स्वतःला पोलीस असल्याचे सांगत सिव्हिल ड्रेसमध्ये तपासासाठी आल्याचा बनाव केला. त्याने ओळखपत्रही दाखवून परिसरातील एका कापड दुकानातील चोरीच्या प्रकरणातील संशयित व्यक्तीबाबत चौकशी सुरू असल्याचे सांगितले.
दरम्यान, तेथे उपस्थित असलेल्या आणखी एका व्यक्तीलाही त्याने बोलावून “परिसरात चोरीचे प्रमाण वाढले आहे, त्यामुळे गळ्यातील दागिने काढून ठेवा,” असा सल्ला दिला. त्या व्यक्तीने त्याच्यावर विश्वास ठेवून स्वतःचे दागिने रुमालात बांधून दिले. त्यानंतर बनावट पोलिसाने विश्वनाथ शेवाळे यांनाही तसेच करण्यास सांगितले.
शेवाळे यांनी गळ्यातील सुमारे पाच तोळ्यांचा सोन्याचा गोफ तसेच प्रत्येकी दीड तोळ्यांच्या दोन सोन्याच्या अंगठ्या काढून दिल्या. मात्र, दागिने रुमालात बांधल्यानंतर आरोपीने ते परत न देता स्वतःच्या खिशात ठेवले आणि सोबतच्या साथीदारासह दुचाकीवरून क्षणार्धात पसार झाला. या प्रकारात सुमारे १० लाख रुपयांचे दागिने लंपास झाले आहेत. चोरीस गेलेल्या ऐवजात पाच तोळ्यांची सोन्याची चैन आणि दोन सोन्याच्या अंगठ्यांचा समावेश आहे.
दरम्यान, मुख्य आरोपी अंगाने मजबूत व गोल चेहऱ्याचा असून त्याने शर्ट-पँट परिधान केली होती. तर त्याचा साथीदार अंगाने सडपातळ असून त्याने पांढरा शर्ट आणि पांढरी पँट घातली होती. दोन्ही संशयितांना पुन्हा पाहिल्यास ओळखू शकत असल्याचे फिर्यादीने पोलिसांना सांगितले आहे. या घटनेमुळे परिसरात खळबळ उडाली असून, बनावट पोलीस बनून नागरिकांची फसवणूक करणाऱ्या टोळीचा शोध घेण्यासाठी मांजरी पोलीस पुढील तपास करीत आहेत.
