पुणे: पुण्यात सोशल मीडिया रीलस्टार दिव्या शिंदे हिच्याविरोधात गंभीर आरोप झाल्याची घटना समोर आली आहे. एका सांस्कृतिक कार्यक्रमाच्या प्रसिद्धीच्या मोबदल्यातून 5 लाख रुपयांची मागणी केल्याचा तसेच पैसे देण्यास नकार दिल्यानंतर 65 वर्षीय निवृत्त डॉक्टरांच्या घरात घुसून मारहाण केल्याचा आरोप करण्यात आला आहे. या प्रकरणी काळेपडळ पोलीस ठाण्यात दिव्या शिंदेसह अण्णा ऊर्फ आप्पा ढमढेरे आणि अन्य 8 ते 10 जणांविरोधात गुन्हा दाखल करण्यात आला आहे.
मिळालेल्या माहितीनुसार, डॉ. विद्याधर गायकवाड हे पुणे कॅन्टोन्मेंट हॉस्पिटलमध्ये मुख्य वैद्यकीय अधिकारी म्हणून कार्यरत होते. निवृत्तीनंतर ते ‘करूणादीप फाउंडेशन’शी संबंधित सामाजिक कामात सहभागी आहेत. या संस्थेच्या माध्यमातून बालगंधर्व रंगमंदिरात ‘कला आविष्कार महोत्सव’ आयोजित करण्यात आला होता.
या कार्यक्रमाच्या प्रसिद्धीशी संबंधित रकमेवरून वाद झाल्याचे पोलिसांत दिलेल्या तक्रारीत नमूद करण्यात आले आहे. तक्रारीनुसार, संबंधितांकडून डॉ. गायकवाड यांच्याकडे 5 लाख रुपयांची मागणी करण्यात आली. त्यांनी ही रक्कम देण्यास नकार दिल्यानंतर काही जण त्यांच्या घरात आले आणि त्यांच्यासोबत मारहाण केल्याचा आरोप आहे. तसेच घरात गोंधळ घालण्यात आल्याचेही तक्रारीत म्हटले आहे.
दिव्या शिंदे ही सोशल मीडियावर रील्समुळे चर्चेत आली होती. ती ‘बिग बॉस मराठी’मध्येही सहभागी झाली होती. फेब्रुवारी 2026 मध्ये शोदरम्यान सहस्पर्धकांना धमकावल्याच्या आरोपानंतर तिला कार्यक्रमातून बाहेर करण्यात आल्याचे वृत्त होते.
आता पुण्यातील या नव्या प्रकरणामुळे दिव्या शिंदे पुन्हा चर्चेत आली आहे. काळेपडळ पोलिसांनी गुन्हा दाखल करून पुढील तपास सुरू केला आहे. या प्रकरणातील आरोपांची सत्यता तपासानंतर स्पष्ट होणार आहे.
