पुणे: लोहगाव परिसरात 35 वर्षीय तरुणाने राहत्या घरी गळफास घेऊन आत्महत्या केल्याची धक्कादायक घटना समोर आली आहे. पत्नीच्या मानसिक त्रासाला आणि कौटुंबिक छळाला कंटाळून त्याने हे टोकाचे पाऊल उचलल्याचा आरोप त्याच्या आईने तक्रारीत केला आहे. या प्रकरणी लोहगाव पोलिसांनी तरुणाच्या पत्नीविरोधात गुन्हा दाखल केला असून पुढील तपास सुरू आहे.
अविनाश अशोक शेळके (वय 35, रा. साठे वस्ती, लोहगाव) असे मृत तरुणाचे नाव आहे. त्याचा सुमारे 3 वर्षांपूर्वी रुबी हिच्याशी प्रेमविवाह झाला होता. लग्नापूर्वी काही काळ दोघे एकमेकांच्या संपर्कात होते. त्यानंतर त्यांनी विवाह करण्याचा निर्णय घेतला. मात्र लग्नानंतर त्यांच्या वैवाहिक जीवनात वाद निर्माण झाल्याचे पोलिसांत दाखल तक्रारीत नमूद करण्यात आले आहे.
मिळालेल्या माहितीनुसार, छोट्या-छोट्या कारणांवरून पती-पत्नीमध्ये वारंवार वाद होत असल्याचा दावा करण्यात आला आहे. पत्नीच्या वागणुकीमुळे अविनाश मानसिक तणावात होता, असे त्याच्या आईने तक्रारीत म्हटले आहे. या त्रासामुळे तो नैराश्यात गेला आणि अखेर त्याने राहत्या घरात गळफास घेऊन जीवन संपवले, असा आरोप करण्यात आला आहे.
घटनेनंतर अविनाशच्या कुटुंबीयांना मोठा धक्का बसला. त्याची आई रेखा अशोक शेळके (वय 63) यांनी लोहगाव पोलीस ठाण्यात जाऊन तक्रार दाखल केली. त्यांच्या तक्रारीनंतर पोलिसांनी रुबी अविनाश शेळके (वय 34) हिच्याविरोधात गुन्हा नोंदवला आहे.
या प्रकरणात आत्महत्येमागील नेमकी परिस्थिती, कौटुंबिक वादाचे स्वरूप आणि तक्रारीतील आरोपांची सत्यता याबाबत पोलीस तपास करत आहेत. तपासातून पुढील माहिती समोर येणार आहे.
